Kakhaber Kaladze, ish-kampion i Europës me Milanin e Ancelottit dhe aktualisht kryetar i Tbilisit, kryeqytetit të Gjeorgjisë, ku kandidon për mandatin e tretë në zgjedhjet e tetorit, është edhe baba i një futbollisti, që i ngjan shumë dhe mban emrin Levan. Ai ka trashëguar emrin e vëllait të babait, që u rrëmbye në vitin 2002 dhe u gjet i vrarë disa vite më vonë.
Në një intervistë për “Gazzetta dello Sport”, Kaladze tregon me emocion jetën e tij mes suksesesh dhe tragjedish. Ai është krenar për djalin, i cili debutoi si profesionist në moshën 16-vjeçare, në fund të korrikut: “Jam krenar dhe i lumtur sepse ai e do shumë futbollin dhe e kishte pritur këtë moment. Do të shohim çfarë do t’i rezervojë e ardhmja, por ka dëshirën të bëhet futbollist. I kam thënë se duhet të punojë shumë për t’ia arritur”.
Për emrin e rëndë që mban, Kaladze thotë se nuk di nëse do ta ndihmojë apo pengojë, por është i sigurt se djali ka mbështetjen e një babai që ka jetuar vite në botën e futbollit, madje në të njëjtin pozicion: mesfushor qendre dhe mbrojtës i majtë: “I jap disa këshilla kur mundem”.
Ai e përshkruan djalin si shumë të ngjashëm me të fizikisht, 1.90 metra në moshën 16-vjeçare, teknikisht i mirë me këmbën e majtë, por duhet të rritet dhe përmirësohet: “Shpresoj që të bëhet edhe më i fortë se unë. E di që nuk është e lehtë, por nëse punon me përkushtim dhe ka fat, mund t’i arrijë majat”.
Kaladze rrëfen edhe tragjedinë familjare: “Vëllai im u rrëmbye më 2001 dhe u gjet i vdekur më 2006. Ishte një ngjarje e tmerrshme, që shkaktoi dhimbje të mëdha për familjen. Më shkatërroi vitin e parë te Milani. Nuk arrij të gjej paqe për atë që i ndodhi”.
Po si arriti ta përballonte gjithçka: “Nuk di nga e mora forcën, por Milani dhe shokët e skuadrës më ndihmuan shumë. Kam karakter të fortë. E dija që nëse unë do të rrëzohesha, familja do ta pësonte më shumë. Kështu vazhdova përpara dhe e kaluam atë dramë. Djali im, që ka marrë emrin e vëllait, e mban kujtimin e tij gjallë”.
Megjithëse është kryetar i një qyteti me mbi një milionë banorë, ai gjen kohë të ndjekë karrierën e djalit të tij: “Administrimi është i vështirë, por si në futboll, ashtu edhe në politikë, nuk mund të bësh asgjë vetëm. Duhet një ekip i madh. Për këtë arsye do të kandidoj për mandatin e tretë në tetor dhe jam i bindur se do të fitojmë. Me partinë tonë ‘Ëndrra Gjeorgjiane’ duam ta zhvillojmë kryeqytetin dhe vendin”.
Kaladze shpreh shqetësimin për luftën në Ukrainë: “Situata në rajonin tonë është shqetësuese, por më shumë më shqetëson ajo që po ndodh në botë, konfliktet e shumta që sjellin vdekje dhe shkatërrim. Ne si Gjeorgji jemi pjesë e Europës dhe po bëjmë gjithçka për ta ndalur luftën”.
I pyetur nëse ndihet më mirë si mbrojtës apo kryetar bashkie, ai qesh dhe thotë: “Të jesh kryetar është përgjegjësi e madhe, por kur arrij të bëj diçka të mirë për qytetin dhe banorët, ndjej një gëzim të madh, si kur fitoja me Milanin”.
Ai dhe shokët e Milanit vazhdojnë të jenë në kontakt përmes WhatsApp: “Ishim një grup i mrekullueshëm, kemi mbetur miq edhe pas shumë kohësh. Të luaja në atë Milan ishte krenari dhe kënaqësi e jashtëzakonshme për mua. Falë presidentit Berlusconi, Gallianit dhe Braidës, krijuam një familje ku ne duhej të merreshim vetëm me futbollin, ata kujdeseshin për gjithçka tjetër. Më ndihmuan edhe në ngjarjen e vëllait tim. Milani për mua do të jetë gjithmonë një shtëpi e dytë, jo vetëm një klub me histori të jashtëzakonshme”.
Për kujtimet nga vitet te Milani dhe Champions-i, ai thotë: “Fitorja e dytë na lejoi të hakmerreshim për humbjen në Stamboll ndaj Liverpool-it, por e para ishte diçka e jashtëzakonshme, sepse kishte shumë të rinj që për herë të parë përjetuan një emocion të tillë. Fitorja ndaj Juventusit në Manchester ishte unike dhe shumë merita i takojnë Ancelottit, një person special”.
Sot në pankinën e Milanit është Allegri: “Ai është fitues, Modric një yll i madh. I uroj Milanit të kthehet në Champions, shtëpinë e tij, dhe të fitojë përsëri. Edhe pse jam larg, gjithmonë do të jem milanist”.
The post Kaladze rrëfen “ferr-parajsën” e jetës: Vëllain ma morën peng dhe vranë, djali im mban emrin e tij. Milani më dha forcë appeared first on Telesport.
