Në prag të transfertës delikate të Milanit në Lecce, pas humbjes në debutim ndaj Cremonese, vjen një lajm tjetër i keq për trajnerin Massimiliano Allegri. Ardon Jashari, siç konfirmoi vetë trajneri në konferencë për shtyp, pësoi lëndim gjatë stërvitjes së fundit, në një përplasje të rastësishme me Gimenez.
Kontrolli mjekësor zbuloi një frakturë të përbërë të peroneut të djathtë. Jashari do të ndjekë trajtim konservativ, pa pasur nevojë për ndërhyrje kirurgjikale.
Pas një paraqitjeje të mirë në “Coppa Italia” kundër Barit dhe një pjese loje mjaft të qetë kundër Cremonese, mesfushori shqiptaro-zviceran do të mungojë për rreth dy muaj. Ky lëndim mund ta detyrojë Milanin të rikthehet në merkato, me Rabiot ende tërheqës, ose të heqë dorë nga shitja e Musah, i ndjekur nga Atalanta.
Përmes rrjeteve sociale, Jashari shpërndau mesazhin e tij, pas lëndimit: “Faleminderit të gjithëve për mbështetjen dhe mesazhet. Qëllimi im i vetëm është të punoj shumë, të kthehem më i fortë se kurrë dhe të kontribuoj për arritjen e objektivave që kemi si skuadër. Forca Milan!”
The post Jashari, frakturë e “peroneus” dhe dy muaj jashtë fushave: “Do të kthehem më i fortë” appeared first on Telesport.
