Izraeli ka konfirmuar se ka marrë një arkivol që Hamasi thotë se e mbante trupin e një pengu tjetër.
Automjetet e Kryqit të Kuq e morën trupin disa orë pasi Hamasi lëshoi një deklaratë të përbashkët me Xhihadin Islamik Palestinez duke thënë se e kishte gjetur atë në zonën Khan Younis në Gazën jugore.
Zyra e kryeministrit izraelit tha se trupi do të transferohet në Izrael, ku do të pritet në një ceremoni ushtarake përpara se t’i nënshtrohet një procesi identifikimi.
Konfirmimi se i përket një pengu do të thotë që 25 nga 28 pengjet e vdekura i janë dorëzuar Izraelit sipas fazës së parë të marrëveshjes aktuale të armëpushimit, e cila është pjesë e një plani amerikan për t’i dhënë fund luftës në Gaza.
Sipas marrëveshjes së armëpushimit, Hamasi pranoi të kthente 20 pengjet e gjallë dhe 28 pengjet e vdekura që mbante ende.
Të gjithë pengjet e gjallë izraelite u liruan më 13 tetor në këmbim të 250 të burgosurve palestinezë dhe 1,718 të paraburgosurve nga Gaza.
Për çdo peng të vdekur izraelit të kthyer, Izraeli ka rënë dakord të dorëzojë eshtrat e 15 palestinezëve. Por, meqenëse nuk ka teste ADN-je në dispozicion në Gaza, është e vështirë t’i identifikosh ata.
Hamasi kapi 251 pengje kur nisi sulmin vdekjeprurës në Izraelin jugor më 7 tetor 2023, gjatë të cilit vrau 1,200 njerëz, shkruan BBC
