Edhe në fund të vitit 2025, presioni mbi çmimet në Kosovë nuk dha shenja të ndalimit. Sipas raportit më të fundit të Bankës Qendrore të Kosovës për muajin nëntor, inflacioni ka shënuar rritje të lehtë krahasuar me muajin paraprak, duke dëshmuar se stabilizimi i plotë i çmimeve mbetet ende i largët, shkruan Demokracia.com.
Të dhënat e BQK-së të cilat i ka parë Demokracia.com, tregojnë se inflacioni i përgjithshëm ka vazhduar trendin rritës, ndërsa rritja nuk është e njëhershme apo e izoluar. Përkundrazi, ajo reflekton presione të vazhdueshme në strukturën e çmimeve, sidomos në kategori që ndikojnë drejtpërdrejt në shpenzimet mujore të qytetarëve. Kjo situatë e bën të qartë se, pavarësisht pritjeve për një zbutje të inflacionit, kostoja e jetesës nuk është stabilizuar.
Raporti evidenton gjithashtu se inflacioni bazë mbetet aktiv, çka nënkupton se rritja e çmimeve nuk lidhet vetëm me faktorë të përkohshëm, por edhe me komponentë më të qëndrueshëm të ekonomisë. Kjo sinjalizon se presionet inflacioniste nuk janë thjesht pasojë e luhatjeve sezonale, por një fenomen që kërkon vëmendje të vazhdueshme institucionale
Në këtë kontekst, të dhënat e BQK-së tregojnë se ekonomia e vendit po hyn në fundvit pa një kthesë të qartë drejt uljes së inflacionit. Edhe pse rritja konsiderohet e lehtë, ajo mjafton për të mbajtur të pandryshuar shqetësimin e qytetarëve për fuqinë blerëse dhe përballimin e shpenzimeve bazë.
Pra, raporti i Bankës Qendrore tregon se inflacioni në Kosovë nuk është ndalur, por po vazhdon. Kjo situatë e vendos sfidën e stabilitetit të çmimeve ende në krye të agjendës ekonomike, ndërsa pritjet për lehtësim mbeten skeptike. /Demokracia.com/
