Një rast i rëndë tronditi mbrëmë Kaçanikun. Rreshteri i këtij qyteti, Muhamed Lika u qëllua për vdekje në afërsi të banesës së tij.
I dyshuari për rastin është ende në arrati, ka konfirmuar Policia e Ferizajt.
Incidenti dyshohet të ketë ndodhur rreth orës 23:00, në rrugën “Idriz Seferi”.
Ndërsa, për rastin ende nuk ka reaguar ministri i Punëve të Brendshme, Xhelal Sveçla, nën dikasterin e të cilin funksionon Policia e Kosovës.
Madje, asnjë fjalë për atentatin ndaj rreshterit Lika, s’e ka thënë as presidentja Vjosa Osmani dhe as kryeministri Albin Kurti.
Reagim ka ardhur vetëm nga kryetari i Kuvendit, Glauk Konjufca.
“Shumë i pikëlluar për vrasjen e rreshterit policor Muhamed Lika në Kaçanik. Kjo është një ngjarje e rëndë dhe tejet pikëlluese, ku u qëllua për vdekje një zyrtar policor i Kosovës, i cili deri dje ishte në shërbim të mbrojtjes së rendit dhe sigurisë së qytetarëve.
Bëj thirrje për hetime sa më të plota e të shpejta që është e mundur, në mënyrë që autori apo autorët e këtij krimi të vendosen përballë drejtësisë”, ka shkruar Konjufca në Facebook.
Për rastin ka reaguar ashpër edhe Sindikata e Policisë së Kosovës.
“Policia e Kosovës është shtylla kryesore e rendit dhe sigurisë në vend. Prekja e saj është përpjekje për të minuar themelet e shtetit tonë dhe nuk do të tolerohet. Sindikata e Policisë së Kosovës kërkon nga të gjithë akterët shtetërorë dhe institucionet e drejtësisë veprime të menjëhershme për zbardhjen e këtij akti kriminal dhe vënien para përgjegjësisë të autorëve”,thuhet në reagimin e sindikatës.
