“Por, do të thosha se kjo administratë – pjesë e së cilës nuk jam – ka qenë më e gatshme për të ndërmarrë veprime që administratat e tjera nuk i kanë ndërmarrë”
Ish-ambasadori i Kosovës, Jeffrey Hovenier, ka sinjalizuar se administrata e Donald Trump mund të ndërmarrë më shumë veprime ndaj Kosovës, nëse e konsideron se po injorohet.
Në një intervistë për Radion Evropa e Lirë, ai tha se nuk ka një përgjigje të qartë nëse SHBA-të do të vendosin kushte për bashkëpunim, por shtoi se kjo administratë dallon nga të tjerat.
“Nuk e di përgjigjen. Mund të them vetëm se është prioritet amerikan që Kosova të jetë e sigurt… Por, do të thosha se kjo administratë – pjesë e së cilës nuk jam – ka qenë më e gatshme për të ndërmarrë veprime që administratat e tjera nuk i kanë ndërmarrë. Prandaj, çdo qeveri e Kosovës duhet të sigurohet që të bashkëpunojë ngushtë me SHBA-në”, deklaroi Hovenier.
Ai theksoi se tashmë Amerika nuk e ka më në qendër të vëmendjes Ballkanin, por Kosova nuk do të braktiset.
“Mendoj se kjo është e vërtetë. SHBA-ja është një fuqi globale dhe mund të ndjekë zhvillimet e interesat e saj kudo në botë. Por është e vërtetë se në vitet ’90 dhe fillim të viteve 2000, çështja e Kosovës merrte vëmendje të drejtpërdrejtë nga presidenti, sekretari i Shtetit, këshilltari i Sigurisë Kombëtare dhe sekretari i Mbrojtjes. Tani nuk është më kështu – dhe kjo është diçka pozitive. Do të thotë se është bërë më e rregullt, më normale”, tha ai.
Hovenier shtoi se Shtetet e Bashkuara nuk do të braktisin partneritetin me Kosovën, por dallojnë mes përkushtimit ndaj shtetit e popullit dhe raportit me qeveritë e veçanta.
“Shtetet e Bashkuara nuk kanë ndërmend të braktisin partneritetin me popullin e Kosovës. Por, ne bëjmë dallimin midis përkushtimit tonë ndaj Kosovës – shtetit, popullit dhe institucioneve – dhe çdo qeverie të veçantë. Dhe është e qartë se administrata e Trumpit ka shqetësime për cilësinë e partneritetit me Qeverinë e kryeministrit në detyrë, Kurti”, tha Hovenier.
