Ajri në Jabllanicë është i rënduar nga pikëllimi. Rrugët e ngushta të fshatit i ka mbuluar heshtja. Banorët janë në zi për Vetonin, Idealin e Ramën…
“Na kanë mbytur me dhimbje këta tre djem. Asnjë problem prej tyre nuk e kemi pasur kurrë”, thotë Mehreme Ahmetaj nga ky fshat i Gjakovës.
Veton Morina, 13 vjeç, Ideal Rama, 15 vjeç, dhe Ramë Mehmetaj, 15 vjeç, humbën jetën më 1 shkurt nga shembja e një objekti të vjetër në Jabllanicë – pjesa jugperëndimore e Kosovës.
Policia tha se objekti u shemb në rrethana ende të panjohura dhe se të miturit ishin brenda në kohën kur ra pllaka e tij.
