Helikopteri Marine One i Donald Trump bëri një ulje emergjente në një aeroport të Mbretërisë së Bashkuar sot me presidentin e SHBA-së dhe gruan e tij Melanian në bord.
Sipas mediave britanike, përcjell Telegrafi, helikopteri presidencial pësoi ‘një problem hidraulik’ ndërsa fluturonte për në Aeroportin e Stansted nga prona e Kryeministrit në Chequers, ku Donald Trump ishte takuar me Sir Keir Starmer për një konferencë të përbashkët për shtyp.
Zyrtarët thanë se fluturakja u ul në Aeroportin e Lutonit ‘për shkak të kujdesit të tepruar’.
Presidenti i SHBA-së, i cili ka qenë në Mbretërinë e Bashkuar për një vizitë historike të dytë shtetërore, u transferua në një helikopter ‘mbështetës’ i cili po fluturonte në formacion dhe vazhdoi udhëtimin për te aeroplani i Air Force One në Stansted.
Askush nuk u lëndua dhe presidenti mbërriti në aeroport 20 minuta pas orarit.
Çifti më pas hipi në Air Force One për udhëtimin e tyre të kthimit në Shtëpinë e Bardhë.
Fotografitë nga vendi i ngjarjes tregojnë automjete emergjente dhe policë të armatosur në pistën e Aeroportit të Lutonit.
Ndërkohë imazhe të ndara tregojnë të dy helikopterët e zotit Trump, të njohur si Marine One dhe Marine Two, pak jashtë pistës.
Sekretarja e shtypit e Shtëpisë së Bardhë, Karoline Leavitt, tha në një deklaratë: “Për shkak të një problemi të vogël hidraulik, dhe për shkak të kujdesit të tepruar, pilotët u ulën në një aeroport lokal para se të arrinin në aeroportin e Stansted”.
“Presidenti dhe zonja e parë hipën në mënyrë të sigurt në helikopterin mbështetës”.
“Presidenti dhe zonja e parë më vonë arritën të hipnin në Air Force One për udhëtimin e kthimit nga Mbretëria e Bashkuar”.
Trump ka përdorur helikopterin e tij Marine One për të udhëtuar midis vendeve të ndryshme në vizitën e tij historike në Mbretërinë e Bashkuar.
