Agjencia e Menaxhimit Emergjent ka njoftuar për një përkeqësim të dukshëm të situatës me zjarret në gjithë territorin e Kosovës, si pasojë e temperaturave të larta dhe erërave të forta, transmeton KosovaPost.
Vetëm në 24 orët e fundit janë regjistruar 66 raste të zjarreve, prej të cilave 57 vetëm gjatë pasdites së sotme.
Sipas njoftimit të AME, 8 vatra aktive të zjarrit janë ende problematike në komunat Pejë, Lipjan, Shtime, Malishevë, Skenderaj, Istog, Ferizaj dhe Gjilan.
Disa prej zjarreve kanë përfshirë sipërfaqe të mëdha pyjore dhe tokash bujqësore, ndërsa vështirësitë në terren po e bëjnë të ndërlikuar lokalizimin e flakëve.
Pavarësisht kësaj, njësitë zjarrfikëse po veprojnë me kapacitete të plota, në bashkëpunim me Policinë e Kosovës dhe autoritetet lokale për të vënë nën kontroll situatën.
Agjencia bën thirrje të fuqishme për qytetarët që:
Të mos ndezin zjarre në ambiente të hapura;
Të raportojnë menjëherë çdo vatër ose tentativë për zjarr në numrat 112 (emergjenca), 193 (zjarrfikësit) dhe 192 (policia);
Të denoncojnë çdo person të dyshuar për zjarrvënie të qëllimshme ose nga pakujdesia.
“Rreziku nga zjarret mbetet i lartë, prandaj kërkohet vigjilencë dhe bashkëpunim maksimal i qytetarëve”, thuhet në njoftim.
The post Gjendje alarmante me zjarret në Kosovë, Agjencia e Emergjencave: Situatë e rënduar ndjeshëm si pasojë e erërave të forta appeared first on Kosovapost.net.
