Bora, akulli dhe temperaturat e ulëta po shkaktojnë kaos në shumë vende të Evropës, duke marrë jetën e së paku gjashtë personave.
Në rajonin Landes, në jugperëndim të Francës, tre persona humbën jetën dhe 15 të tjerë u plagosën në aksidente rrugore të martën. Dy të tjerë vdiqën në aksidente pranë Parisit, përfshirë një shofer që ra në lumin Marne dhe një tjetër pas përplasjes me një kamion. Në Sarajevë, një grua vdiq pasi një degë e mbuluar me borë i ra mbi kokë.
Shumë fluturime nga aeroportet kryesore të Parisit, Roissy-Charles de Gaulle dhe Orly, u anuluan të mërkurën për pastrimin e pistave dhe heqjen e akullit nga avionët. Në Holandë, qindra fluturime u anuluan në aeroportin Schiphol, ndërsa shërbimet hekurudhore u ndërprenë për shkak të një problemi teknik dhe motit të keq.
Në Gjermani, termometri ra nën -10°C në jug dhe lindje, ndërsa meteorologët paralajmërojnë stuhi të premten me borë të dendura. Në Britani, temperaturat ranë deri në -12.5°C, duke shkaktuar probleme në transport dhe mbylljen e shkollave.
Në veri të Italisë, temperaturat ranë nën zero dhe borë pritet në zonat Emilia-Romagna, Marche dhe Toskana. Në Romë, reshjet e dendura shiu kanë rritur nivelet e lumit Tiber dhe kanë kufizuar pjesëmarrjen në bekimin e Papës për Epifaninë. Kryetari i qytetit ka ndaluar qasjen në parqe dhe zona me rrezik për rrëzim pemësh dhe përmbytje.
Në Ballkan, borë dhe shi i dendë ka shkaktuar përmbytje, ndërprerje energjie dhe probleme në trafikun rrugor. Në Serbi, disa autoritete lokale kanë shpallur masa emergjente, ndërsa era e fortë dhe deti i stuhishëm godasin bregdetin e Adriatikut në Kroaci dhe Mal të Zi.
