Ish-kryetari i Odës Ekonomike të Kosovës, Safet Gërxhaliu, ka reaguar mbi ndikimin e masave ndëshkuese të Bashkimit Evropian ndaj Kosovës. Ai tha se këto masa nuk kanë dëmtuar vetëm ekonominë dhe institucionet vendore, por edhe kompanitë dhe konsorciumet evropiane që punojnë në vend.
Gërxhaliu theksoi se shumë projekte të financuara nga BE-ja dhe donatorë të tjerë janë fitim për dy palët: jo vetëm për Kosovën, por edhe për kompanitë zbatuese evropiane, përmes shpenzimeve për tenderë, teknologji, konsulencë, transport, hotele dhe paga.
Sipas tij, pezullimi ose ngadalësimi i projekteve ka krijuar efekte zinxhir negative: bashkëpunime të ndërprera, vonesa në implementim, rritje të kostove dhe humbje mundësish për partnerët evropianë.
Gërxhaliu gjithashtu nënvizoi se pasojat kanë prekur imazhin ndërkombëtar të Kosovës. “Të jesh i vetmi shtet evropian pas Rusisë dhe Bjellorusisë me masa të tilla nuk i bën nder Kosovës,” tha ai, duke shtuar se investitorët e huaj kanë anashkaluar vendin për disa vite për shkak të pasigurisë.
Në thelb, ai e përshkroi ndikimin e masave si një goditje për zhvillimin ekonomik, besueshmërinë e projekteve evropiane dhe reputacionin ndërkombëtar të Kosovës.
