Në nëntorin e vitit 2020 u arrestuan. E kur po bëhen katër vjet e gjysmë në Hagë, krerët e UÇK-së po mbahen në Qendrën e Paraburgimit e cila ndodhet në Scheveningen të Hagës.
Pak minuta larg objektit ku mbahen seancat e Gjykatës Speciale, ndodhet edhe objekti i Paraburgimit.
Brenda hapësirës së paraburgimit, lëvizjet nuk janë të shpeshta. Vizitorë tash ka shumë pak, e ata që lëvizin më së shumti janë gardianët.
Aty, sidomos në dy vitet e fundit, krerët e UÇK-së kanë pasur masa e kushte strikte për vizita, telefonata dhe lidhje me video.
Krejt kjo erdhi pas dyshimeve për tentativa për pengim të drejtësisë, të cilat kulmuan me një aktakuzë tjetër ndaj Hashim Thaçit.
Nacionale për disa ditë do të jetë në Hagë.
Nga atje, Nacionale raporton se ish-krerët e UÇK-së kanë hapësirë vetëm për 5 vizita në muaj. Ato monitorohen gjatë gjithë kohës me policë e përkthyes. Vizitat nuk mund të zgjasin më shumë se 40 minuta, dhe nuk realizohen pa një miratim paraprak, që zgjat goxha shumë.
Përveç vizitave, kufizime të ashpra në Qendrën e Paraburgimit ka pasur edhe për video-lidhje.
Thaçit, Veselit, Krasniqit e Selimit i lejohen vetëm 5 video-lidhje në muaj, secila nga 40 minuta, me një procedurë miratimi gjithashtu të komplikuar.
E për telefonata, krerët e UÇK-së duhet të tregojnë një muaj përpara me kënd duan të flasin.
Atyre iu lejohet një thirrje në ditët e gjykimit për 15 minuta, dhe dy thirrje në ditët që nuk ka gjykim gjithashtu 15 minuta.
