Ka zhvillime tek Interi, sidomos në mesfushë. Nga njëra anë, Davide Frattesi po shtyn për t’u larguar, me Romën, Napolin dhe Fenerbahçe të gatshme ta kërkojnë, por vetëm duke përmbushur kërkesat e zikaltërve. Nga ana tjetër, duket më pak i mundshëm një largim i menjëhershëm i Hakan Çalhanoglu. Turku ishte pranë shitjes në verë, por kjo nuk u konkretizua dhe në fillim të sezonit është rikthyer si pikë referuese e Interit.
Sipas “Corriere dello Sport”, në Turqi janë të bindur se në janar, Galatasaray, që e kërkoi ish-lojtarin e Milanit në verë, mund të rikthehet në sulm. Megjithatë, klubi i drejtuar nga Marotta vështirë se do të heqë dorë nga Çalhanoglu në merkaton dimërore.
Interi jo vetëm që nuk e lëshon “regjisorin”, por mund edhe ta “blindojë”. Javët në vijim pritet të nisë dialogu për rinovimin e kontratës (skadon më 2027). Ka pasur tashmë kontakte, në një klimë të qetë pas tensioneve të mëparshme. Në fund të sezonit do të merret vendimi; ose rinovim, ose shitje për të shmangur largimin falas.
The post Galatasaray provon sërish për Çalhanoglu. Asnjë largim në janar, madje mund të rinovojë appeared first on Telesport.
