Ish-banori i Big Brother VIP Albania, G Bani, ka ngritur dyshime serioze mbi mënyrën se si po zhvillohet loja brenda shtëpisë dhe nëse disa nga banorët kanë pasur informacion nga jashtë.
Në një deklaratë të gjatë, ai ka shprehur shqetësimet e tij mbi disa detaje që sipas tij tregojnë se loja nuk është krejtësisht e drejtë.
Në mënyrë të tërthortë, ai aludon se Gjesti mund të ketë qenë në dijeni të mesazheve që qarkullojnë jashtë, duke vënë në dukje përdorimin e frazave të caktuara që janë bërë virale në rrjetet sociale kundër tij.
“Kush i tha miut me knu kundër meje kangët e atyne që po protestonin jasht shpis në favor të tij?”, ka shkruar ai, duke lënë të kuptohet se disa veprime të banorëve brenda mund të kenë qenë të udhëzuara nga jashtë.
Gjithashtu, G Bani ngre pikëpyetje mbi disa situata të ndodhura brenda shtëpisë, si për shembull përzgjedhjen e nominimeve, dinamikën e finales dhe mbështetjen që disa banorë po marrin nga jashtë. “Kush vendosi mos me u përmen në Prime kapja e durve të Lorit nga Rozana?”, ka shtuar ai, duke sugjeruar se disa tema mund të jenë anashkaluar nga produksioni.
Një tjetër shqetësim i ngritur prej tij është edhe trajtimi i fjalëve bullizuese brenda shtëpisë. Ai sugjeron se rastet e fyerjeve ndaj tij nuk janë trajtuar me të njëjtin seriozitet si raste të tjera, duke lënë të kuptohet se mund të ketë një pabarazi në mënyrën se si produksioni menaxhon situatat.
Reagimi i tij ka shkaktuar shumë diskutime në rrjetet sociale, me fansat që ndahen mes atyre që mbështesin shqetësimet e tij dhe të tjerëve që e shohin këtë si një tentativë për të justifikuar daljen nga gara. Pavarësisht gjithçkaje, këto deklarata kanë shtuar edhe më shumë debat mbi transparencën e lojës në BBVA.
I njëjti më pas publikoi një video ku përgënjeshtroi mediat që kishin shkruar se ai i ka dyshimet mbi produksioniin, duke thënë se në fakt dyshon që informacionin nga jashtë, Gjesti e merr nga banorët e rinj.
