Studiuesit thonë se ky është një “kolaps historik” i imazhit të SHBA-ve në Francë.
Në rrugët e Parisit ka marrë jetë kohët e fundit, një lëvizje midis francezëve për të refuzuar markat dhe produktet të prodhuara në Shtetet e Bashkuara.
Kjo, si shenjë proteste ndaj tarifave tregtare të Donald Trump dhe retorikës anti-Evropë, shkruan The Guardian.
Një sondazh, i cili zuri ballinën e gazetës Libération javën e kaluar, zbuloi se më shumë se gjashtë në 10 francezë mbështesin shmangien e produkteve amerikane dhe pothuajse një në tre tashmë po i shmang ato.
Hashtag-u #BoycottUSA është përhapur në rrjetet e mediave sociale në atë që studiuesit thonë se është një “kolaps historik” i imazhit të SHBA-ve në Francë, partneri i tretë tregtar evropian i Amerikës.
Coca-Cola, McDonald’s, Tesla, Starbucks, KFC dhe X janë ndër markat amerikane të cituara si ato që duhen shmangur.
Ata që u pyetën nga anketuesit cituan gjithashtu Apple, Microsoft, platformat e rezervimit Airbnb dhe Tripadvisor, Nike dhe Converse.
Çfarë thonë konsumatorët francezë dhe çfarë bëjnë ata janë çështje të ndryshme, tha François Kraus nga anketuesit Ifop, i cili kreu studimin.
“Ne kemi filluar të shohim një sanksionim të SHBA-ve dhe politikave të saj në qëndrimet e njerëzve, por ka një hendek midis pozicionit që njerëzit kanë në parim dhe asaj që ata bëjnë në praktikë”, tha Kraus për Observer.
Sondazhi zbuloi se simpatizantët e majtë demokratë, ata mbi moshën 65 vjeç dhe ata me të ardhura neto mbi 2 mijë e 400 euro në muaj ishin më shumë në favor të bojkotit.
Anketa nxorri në pah po ashtu se francezët ishin veçanërisht të zemëruar nga tarifat tregtare, diversiteti dhe shtypja e gjithëpërfshirjes së Trump-it dhe trajtimi i presidentit ukrainas Volodymyr Zelensky në Zyrën Ovale.
Kërcënimet e Trump për të rritur taksën e importit për verërat dhe shampanjën franceze dhe evropiane në 200 për qind kanë ulur gjithashtu entuziazmin për SHBA-të.
Mbështetja për bojkotin duket se kapërcen grupet shoqërore që zakonisht lidhen me aktivizmin politik, zbuloi sondazhi.
Kraus ravijëzoi se popullariteti i SHBA-ve si destinacion studentor, pushimi dhe biznesi është në nivelin më të ulët në 40 vjet.
Marrë dhe përshtatur nga The Guardian për Albanian Post
