Në mesin e organizatave të cilat përfituan sivjet fonde nga ministria e drejtuar nga Hajrulla Çeku, është edhe organizata “Plan Kulturë”, me shkurtesën “Plan K”.
Kjo organizatë joqeveritare përfitoi hiç më pak se 17 mijë euro për organizimin e festivalit “Shqip Up Festival” në Cyrih të Zvicrës.
Por ajo që bie në sy në listën e gjatë të ministrisë është mospërputhja e datave, raporton Kiks Kosova.
Ministria e hapi thirrjen për projekt-propozime në fushën e artit, kulturës dhe trashëgimisë kulturore për vitin 2025, më 27 shkurt.
Thirrja qëndroi e hapur deri më 24 mars në orën 23:59.
Ndërkaq, organizata “Plan K”, e cila përfitoi 17 mijë euro nga Ministria, u regjistrua në Kosovë vetëm 72 orë para se të mbyllej kjo thirrje.
“Plan K” në sistemin elektronik të organizatave joqeveritare figuron se është regjistruar si organizatë vendore më 21 mars të 2025-ës, fiks tri ditë parë se të mbyllet afati për aplikim në thirrjen e MKRS-së për projekt-propozime në fushën e artit, kulturës dhe trashëgimisë kulturore për sivjet.
Madje, aktori Ridvan Murati, emri i të cilit figuron si drejtor ekzekutiv i kësaj organizate, tha për Kiks Kosovën se aplikimi i tyre për regjistrimin e organizatës nuk është pranuar ende.
Ndonëse në regjistrin online të OJQ-ve në Kosovë, “Plan K” figuron si organizatë vendore, Murati tha se kjo organizatë është e regjistruar në Zvicër.
Mirëpo, drejtori i “Plan K” refuzoi që t’ia dërgojë emisionit faktet të cilat vërtetojnë që organizata e tij është e regjistruar në Zvicër.
