Koalicioni ndërmjet Lidhjes Demokratike të Kosovës (LDK) dhe Lëvizjes Vetëvendosje (VV) në Komunën e Gjilanit, të udhëhequr nga kryetari Alban Hyseni, ishte një bashkëpunim që nuk zgjati shumë. Pasi u ndanë rrugët në 2023, Demokracia.com ka zbuluar se ish-partia në pushtet, LDK, po vazhdon të përfitojë nga kontratat me pushtetin lokal.
Një nga përfituesit është edhe familja e asamblistes së LDK-së, Gresa Avdiu. Ajo mban pozicionin e nënkryetares së Forumit Rinor të LDK-së në Gjilan dhe është asambliste në Kuvendin Komunal që nga viti 2021.
Për furnizim me ‘ Furnizimi me Farë Misri dhe Pleh Artificial ’ është shpërblyer kompania “Agro Gresa SH.P.K”, ndonëse ishte e vetëm në garë. Vlera e kontratës është 43,600.00 euro.
Sipas deklarimit të saj të pasurisë vitin e kaluar, Avdiu ka shënuar se është menaxhere e kompanisë “Agro Gresa”, e cila është në pronësi të babait të saj, Avdi Avdiu, sipas të dhënave në ueb-faqen e ARBK-së.
Bëhet fjalë për, fare misri nga grupi FAO.
Edhe në vitin e kaluar, Komuna e Gjilanit ka rekomanduar kompaninë “Agro Gresa” për një kontratë të rëndësishme për furnizimin me 200,000 kilogramë farë gruri, vlera e së cilës është 74,000 euro.
Kompania ishte në konkurrencë me një tjetër ofertues, por u rekomandua për shkak të çmimit më të ulët të ofruar.
Përtej faktit që ajo promovon herë pas here biznesin e saj në rrjetet sociale, përfshirja e një zyrtareje të lartë, si menaxhere në një biznes privat, mund të përbën një shkelje të ligjit për konfliktin e interesit.
Demokracia.com ka gjetur se neni 13, paragrafi 1 dhe neni 14, paragrafi 1 i Ligjit për Parandalimin e Konfliktit të Interesit ndalojnë zyrtarët e lartë të jenë menaxherë ose përfaqësues të autorizuar në kompani private fitimprurëse, përveç rasteve të parashikuara në ligj.
“Zyrtari i lartë nuk mund të jetë menaxher, përfaqësues i autorizuar ose anëtar i ndonjë organi menaxhues apo mbikëqyrës i personave juridik privat, fitimprurës sipas ligjit përkatës për shoqëritë tregtare dhe organizatave joqeveritare, përjashtuar subjektet e përcaktuara në nenin 14 të këtij ligji”.
Një tjetër detaj që bie në sy është se, sipas ARBK-së, aktiviteti kryesor i kompanisë “Agro Gresa” është tregtia me shumicë e produkteve kimike. /Demokracia.com/
