Miliarderi amerikan i teknologjisë, Elon Musk ka shprehur shpresën se në të ardhmen do të krijohet një zonë e tregtisë së lirë midis Shteteve të Bashkuara të Amerikës dhe Evropës. Kjo deklaratë e tij erdhi disa ditë pas njoftimit të presidentit amerikan, Donald Trump, për vendosjen e tarifave të reja ndaj partnerëve tregtarë.
Në një intervistë për Reuters, Musk tha: “Në fund të ditës, shpresoj se është rënë dakord që si Evropa ashtu edhe SHBA duhet të lëvizin në mënyrë ideale, sipas mendimit tim, drejt një situate tarifore zero, duke krijuar në mënyrë efektive një zonë të tregtisë së lirë midis Evropës dhe Amerikës së Veriut”.
Deklarata e Musk vjen pas planeve të shpallura nga presidenti amerikan, ku Italia, një nga vendet me një suficit të madh tregtar ndaj SHBA-së, do të përballet me tarifa prej 20%, së bashku me vendet e tjera të Bashkimit Evropian.
Musk, i cili ka shprehur vazhdimisht mbështetje për partitë e krahut të djathtë në Evropë, ka theksuar se ai dëshiron të shohë një lëvizje të lirë midis dy kontinenteve, duke u dhënë mundësia njerëzve që të punojnë dhe të lëvizin pa pengesa në SHBA dhe Evropë.
“Nëse njerëzit dëshirojnë të punojnë në Evropë ose dëshirojnë të punojnë në Amerikën e Veriut, ata duhet të lejohen ta bëjnë këtë sipas mendimit tim”, shtoi ai.
Në përfundim, Musk tha se kjo ka qenë gjithashtu këshilla e tij për presidentin amerikan, duke shprehur një mendim të qartë për të ardhmen e marrëdhënieve tregtare midis dy kontinenteve.
