Grupi “Asnjë cent më shumë” i ka bërë të gjitha përgatitjet për protestën e sotëm kundër shtrenjtimit të rrymës. Protesta, e cila do të mbahet në ora 15:00 në sheshin “Skënderbeu”, ka për qëllim ngritjen e zërit të qytetarëve kundër rritjes së tarifave të rrymës për 15%!
Organizatorët dhe njerëzit e shoqërisë civile iu kanë bërë thirrjeve qytetarëve që të dalin sot në protestë në numër sa më të madh.
Njeri nga organizatorët e protestës, Luan Hasanaj, ka thënë se shtrenjtimi i rrymës është shumë i dëmshëm për qytetarët e vendit.
“Është një mesazh i thjeshtë, reagimi ynë ka ardhur si rezultat i një trendi të rritjes së çmimeve në mënyrë pothuajse të pakontrolluar të viteve të fundit. Grup shumë i madh i qytetarëve mezi e kalojnë muajin me të hyrat që i marrin dhe duke e parë se çfarë po vjen”, ka thënë ai për Klan Kosova, duke dhënë detaje tjera.
“Kur themi se 15% do të rritet çmimi i rrymës dhe kjo do të ketë efekt zinxhir në secilin sektor, mesazhi ynë për ata që janë vendimmarrës është i thjeshtë: na mundësoni që ne qytetarët që kemi vendosur të jetojmë në këtë vend, të kemi mundësi që t’i përballojmë këto çmime dhe faturat që na vijnë çdo muaj”, është shprehur ai.
Ai ka paralajmëruar se veprimet për të kundërshtuar shtrenjtimin e rrymës nuk do të ndalen.
“Ne të vetmin që e kemi në dorë është zëri ynë dhe reagimi qytetar, pra ne nuk do t’i ndalim protestat. Do të kërkojmë që të jetojmë normalisht në këtë vend. Ne e kemi bërë një kërkesë shumë të thjeshtë për ZRrE-në, i kemi thënë ta pezullojë këtë vendim në këtë kohë, t’i presim konstituimin e institucioneve, pra jemi pa qeveri, janë në prag institucionet”, ka thënë ai.
Edhe analisti Shenoll Muharremi, i cili në të gjitha mënyrat e mundshme po e kundërshton shtrenjtimin e rrymës, ka ftuar qytetarët për protestë.
“Kur po na i ktheni paret? 🤷🏻♂️Nesër n’Shesh 15h”, ka shkruar Muharremi.
Kurse, gazetari Lirim Mehmetaj ka bërë me dije se vetëm një protestë masive mund ta ndalë shtrenjtimin e rrymës.
Në profilin e tij në “Facebook”, Mehmetaj ka shkruar se qeveria aktuale dhe ZRrE-ja e njohin vetëm tuten.
“Hajdi neser ne proteste se keta vec tuten e dijne… Neser organizohet nje proteste kunder rritjes se cmimit te rrymes. Nje qeveri qe nuk e mbron qytetarin e shkakton pasojen e domosdoshme te ngritjes se qytetarit ne mbrojtje te vetes. S’ka sen me te rendesishem me bo neser se sa me iu bashku protestes. Pasha nje Zot, ai qe s’ka dhembshuri e nuk manifeston respekt, vec tuten e din. Kjo qeveri, keta njerez, duhet me i tute si mundesia e vetme qe me ndermarre diçka”, ka shkruar ai në profilin e tij në “Facebook”.
Ai është shprehur i bindur se vetëm me protestë mund të ndalet shtrenjtimi i rrymës.
“Nese shohin neser shume njerez, tuten. Kur tuten reagojne. Nese shohin pak veta, vec e trashin zullumin. Hajdeni krejt se rryma njejte po na shtrenjtohet. S’po kryne pune ngjyrimi partiak. S’kish pas ndjenje me te mire sesa me pjesmarrjen tuaj ne kete proteste me pamundesu rritjen e cmimit te energjise. Boll ka fitu Martin Berishaj, le t’i kursejme pak edhe per vete”, ka shkruar ai.
Propozimi për shtrenjtimin e energjisë elektrike është kundërshtuar fuqishëm nga qytetarët, opozita, shoqëria civile dhe institucione të caktuara. Një që e tillë po shihet i panevojshme dhe në dëm të qytetarëve.
Individë të ndryshëm, OJQ dhe institucione të caktuara kanë dorëzuar komentet e tyre në ZRRE, ku kanë treguar se si mund të shmanget rritja e tarifave.
Në këto komente, në detaje, tregohen masat që duhet të ndërmerren nga operatorët energjetikë në mënyrë që t`i kursehen qytetarët nga ngritja e serishme çmimit të energjisë elektrike.
