Dua Lipa nuk gabon kurrë kur vjen puna te moda – dhe këtë e dëshmoi sërish teksa mori pjesë në gala mbrëmjen e 50-vjetorit të Chaplin Awards në New York, mbrëmjen e së hënës, ku nderoi regjisorin e njohur spanjoll, Pedro Almodovar.
Këngëtarja 29-vjeçare tërhoqi vëmendjen e të gjithëve me një fustan të zi transparent prej rrjete, me prerje të guximshme, ndërsa pozonte me vetëbesim në tapetin e kuq.
Ajo kompletoi pamjen me take të larta të zeza me rripa të shndritshëm, dhe e theksoi stilin me një gjerdan të madh prej ari, shkruan DailyMail.
Ylli i hitit “One Kiss” i kishte lëshuar flokët e errët në onde natyrale mbi supe, ndërsa grimi me tone bronzi i dha një shkëlqim të ngrohtë fytyrës së saj.
Gala mbrëmja e Çmimit Chaplin është ngjarja kryesore vjetore e mbledhjes së fondeve nga organizata “Film at Lincoln Center” dhe ndër vite ka nderuar shumë prej emrave më të shquar të industrisë së filmit. Gjatë mbrëmjes, Dua Lipa mbajti një fjalim për të nderuar mikun e saj dhe fituesin e këtij viti – Pedro Almodovar.
Të ardhurat nga eventi do të shkojnë për programet jofitimprurëse të organizatës, përfshirë seritë filmike, nismat edukative dhe ngjarjet madhore si Festivali i Filmit të New York-ut dhe “New Directors/New Films”.
Pjesëmarrja e saj në këtë ngjarje vjen pak ditë pasi këngëtarja publikoi në Instagram disa foto nga pushimet e Pashkëve me të fejuarin Callum Turner në Shqipëri.
Këngëtarja e “Dance The Night” u shfaq në formë të shkëlqyer në bikini të kuqe me prerje të vogël, ndërsa shijonte diellin dhe rërën në një plazh shqiptar.
Në përshkrimin e albumit fotografik, ajo shkroi “Pashkët në shtëpi” – duke shtuar një emoji lepurushi dhe një flamur shqiptar.
Në një tjetër foto, Dua shihej e veshur me një bluzë të shkurtër të zezë dhe tuta sportive, me flokët e lidhur në një bisht të rregullt.
Çifti u fotografua duke qeshur dhe bërë shaka mes vete, ndërsa në një prej fotove Dua i shtypte fytyrën Callumit, i cili buzëqeshte i kënaqur.
Në një moment tjetër, të dy u filmuan teksa vraponin dhe hidheshin nga një mol në ujë, me sfondin e shkëmbinjve të bukur shqiptarë.
Dua dhe Callum u përfolën për herë të parë si çift në janar të vitit 2024 dhe thuhet se janë fejuar drejt fundit të vitit të kaluar.
Vetëm së fundmi ata kanë dalë publikisht me lidhjen e tyre, pasi më parë rrallëherë janë parë bashkë në publik.
Në dhjetor doli lajmi se Callum i kishte propozuar Duas në mënyrë romantike, duke u gjunjëzuar. Unaza e fejesës thuhet se përmban një diamant klasik të vetëm, të vendosur mbi një rrip ari 18 karatësh, dhe vlera e saj llogaritet të jetë deri në 25 mijë funte.
Ekspertja e bizhuterive, Anya Walsh nga “77 Diamonds” tha për MailOnline: “Unaza duket të jetë një diamant klasik i vetëm mbi një rrip të trashë ari të verdhë, me pamje të guximshme dhe elegante njëkohësisht”.
Sipas saj, një diamant cilësor prej 2 karatësh në një rrip të tillë të gjerë do të kishte një çmim rreth 20,000 deri në 25,000 funte.
