Shërbimi Danez i Inteligjencës së Mbrojtjes (DDIS) ka përfshirë për herë të parë SHBA-të në listën e kërcënimeve ndaj Danimarkës, duke akuzuar Shtetet e Bashkuara për përdorimin e fuqisë ekonomike dhe kërcënimeve ushtarake për të imponuar vullnetin e tyre ndaj aleatëve.
Raporti vjetor i DDIS paralajmëron se Danimarka po përballet me sfida të rënda në fushën e sigurisë, sidomos në Arktik, ku rivaliteti midis superfuqive, SHBA-të, Rusia dhe Kina, po rritet. Arktiku ka rëndësi strategjike për SHBA-të, veçanërisht Grenlanda, e cila mbetet pjesë e Mbretërisë Daneze dhe ka një rol kyç në sigurinë kombëtare amerikane.
Raporti gjithashtu nënvizon rritjen e kërcënimeve nga spiunazhi, përfshirë ato kibernetike dhe përpjekjet për të ndikuar në të gjitha pjesët e mbretërisë daneze. Megjithatë, Thomas Ahrenkiel, kreu i DDIS, thekson se SHBA-ja mbetet aleati më i afërt i Danimarkës dhe garantuesi i sigurisë evropiane përmes pranisë së saj dhe çadrës bërthamore.
Sidoqoftë, raporti paralajmëron se përdorimi i fuqisë ekonomike dhe kërcënimet e mundshme ushtarake nga SHBA-ja kundër aleatëve, si dhe pasiguria mbi rolin e saj si garantues i sigurisë, mund të nxisin një intensifikim të sulmeve hibride nga Rusia ndaj NATO-s.
Ky raport vjen në një kohë tensioni të shtuar mes Danimarkës dhe SHBA-ve, pas pretendimeve të ish-presidentit Trump për kontrollin e Grenlandës dhe vizitave të zyrtarëve amerikanë që kanë kritikuar menaxhimin danez të rajonit.
