Te Napoli diçka nuk shkon, kjo është e qartë. Mund të jenë afrimet e shumta të reja në merkaton verore, ndoshta tepër për Antonio Conte. Ndoshta ndryshimi i modulit të lojës. Pastaj vijnë dëmtimet e shumta, mungesa e grintës dhe njëfarë relaksimi pas suksesit të madh të sezonit të kaluar. Edhe forca e rivalëve ka ndikuar, pa harruar një dozë fati të keq.
Humbja turpëruese ndaj PSV tregoi gjithashtu limitet e vetë trajnerit, i cili historikisht ka pasur vështirësi në Europë, veçanërisht në Champions League. Statistikat e tij flasin vetë: Conte në 45 ndeshje si trajner në Champions ka 16 fitore, 14 barazime dhe 15 humbje. Pra, mesatare prej 1.38 pikësh për ndeshje.
Me Juventusin: 14 ndeshje (6 fitore, 4 humbje, 4 barazime).
Me Chelsea: 8 ndeshje (3 fitore, 2 humbje, 3 barazime).
Me Interin: 12 ndeshje (3 fitore, 5 humbje, 4 barazime).
Me Tottenhamin: 8 ndeshje (3 fitore, 2 humbje, 3 barazime).
Me Napolin: 3 ndeshje (1 fitore, 2 humbje).
Rezultati më i mire? Çerekfinalet e edicionit 2012-2013 me Juven (u eliminua ndaj Bayernit). Dy herë të tjera arriti në 1/8 finale, me Chelsea (2017/18, eliminuar nga Barcelona) dhe Tottenham (2022/23, eliminuar nga Milani). Në pjesën tjetër të rasteve është eliminuar që në fazën e grupeve. Në Europë, Conte mbetet një trajner që “lundron”, por nuk shkëlqen.
The post Conte dhe “makthi” i Ligës së Kampionëve. Nga Juve te Napoli, shifrat janë të pamëshirshme appeared first on Telesport.
