Një “revolucion” i heshtur po përgatitet në shtëpinë e Chelsea. Sipas raportit ekskluziv të prestigjiozes amerikane “The New York Times”, klubi londinez ka vendosur t’i japë fund aventurës së disa lojtarëve që nuk konsiderohen më pjesë e projektit teknik të trajnerit të ri, Enzo Maresca. Në listën e “tepricave” për sezonin e ardhshëm figuron edhe sulmuesi shqiptar Armando Broja, së bashku me emra të njohur si Raheem Sterling, Ben Chilwell, Axel Disasi, Renato Veiga dhe Carney Chukwuemeka.
Një sinjal i qartë që konfirmon se Chelsea është në fazë rindërtimi të thellë, ku prioriteti absolut është reduktimi i numrit të lojtarëve dhe arkëtimi i fondeve për të rregulluar financat. Aktualisht, merkatoja e bluve të Londrës është praktikisht e bllokuar, pikërisht sepse drejtuesit e klubit kanë si synim parësor të krijojnë hapësira financiare për të mos rrezikuar shkeljen e rregullave të “Fair Play Financiar”, të vendosura nga UEFA dhe Premier League. Këto kufizime financiare i kanë detyruar drejtuesit të marrin vendime të ashpra, edhe ndaj lojtarëve që vetëm një apo dy vite më parë konsideroheshin investime të rëndësishme për të ardhmen.
Broja, i cili u rikthye në fushë pas dëmtimit të rëndë që pësoi në dhjetor 2022, nuk ka arritur të bindë as Pochettino më parë, nuk duket se bën pjesë edhe në planet e Maresca. Sulmuesi i kombëtares shqiptare u huazua përkohësisht te Fulham, pastaj tek Evertoni, por nuk arriti të linte gjurmë. Chelsea kërkon të përfitojë rreth 25-30 milionë euro nga shitja e tij, me interesim nga disa klube të Premier League si Wolverhampton, Everton dhe Aston Villa, ndërsa në horizont qëndrojnë edhe disa pista nga Bundesliga.
Në rastin e Sterling, paga e tij e lartë e bën largimin më të komplikuar, ndërsa Chilwell dhe Disasi janë bërë “viktima” të politikës së ristrukturimit, që synon t’iu japë më shumë hapësirë elementëve më të rinj si Malo Gusto dhe Levi Colwill.
Në prapaskenë, sipas “The New York Times”, qëndron edhe plani i ri sportiv i Maresca, i cili ka kërkuar një skuadër më të reduktuar, për ta menaxhuar në mënyrë më të përshtatshme për futbollin e tij të bazuar te zotërimi i topit dhe qarkullimi i shpejtë. Broja, i cili është më shumë një sulmues fizik, nuk përputhet me këtë profil.
Në këtë situatë, gjithçka do të varet nga aftësia e Chelsea për të gjeneruar të ardhura nga këto shitje. Vetëm pas kësaj faze pritet që klubi të bëhet më aktiv në merkato, me disa objektiva konkretë tashmë të skanuar nga Maresca dhe drejtuesit. Mes tyre, një tjetër qendërsulmues mund të mbërrijë, Joshua Zirkzee ose Victor Osimhen, për të plotësuar boshllëkun e lënë nga Broja.
E ardhmja e shqiptarit duket larg “Stamford Bridge” dhe, sipas të gjitha gjasave, vera e këtij viti do të jetë vendimtare për ta kthyer karrierën e tij në rrugën e duhur.
The post Chelsea nis operacionin “fshesa”, Broja mes “tepricave”. Maresca nuk e llogarit sulmuesin shqiptar appeared first on Telesport.
