Bisedat e ndjeshme mund të përfundojnë në gjykatë, përveç shqetësimeve të tjera për privatësinë, përcjell Kosova Post.
Nëse të duhet një arsye tjetër për të rishikuar përdorimin e një boti me inteligjencë artificiale si terapist, dëgjo kreun ekzekutiv të OpenAI, Sam Altman.
Gjatë një interviste të fundit në emisionin This Past Weekend me Theo Von, Altman pranoi se industria e inteligjencës artificiale nuk e ka zgjidhur ende çështjen e privatësisë së përdoruesve kur bëhet fjalë për biseda të ndjeshme. Ndryshe nga një profesionist i licencuar, një AI nuk ofron konfidencialitet ligjor, dhe ligjërisht, bisedat më personale nuk janë të mbrojtura.
“Njërëzit i tregojnë ChatGPT-së gjërat më personale në jetën e tyre,” tha Altman. “Veçanërisht të rinjtë e përdorin si terapist, si këshillues për jetën, i pyesin për probleme në marrëdhënie dhe çfarë të bëjnë.”
Por ekziston një ndryshim i madh: “Nëse flet me një terapist, avokat apo mjek për këto probleme, ekziston mbrojtje ligjore për atë që thua… Ndërsa ne nuk e kemi zgjidhur ende këtë për bisedat me ChatGPT.”
Pa mbrojtjen e konfidencialitetit, çdo gjë e thënë në një “seancë terapie” me AI mund të aksesohet ose të kërkohet me urdhër gjykate. Industria e AI aktualisht operon në një zonë gri ligjore, ndërsa administrata Trump, vazhdon të përpiqet të balancojë kompetencat federale dhe shtetërore mbi rregullimin e AI.
Ndërkohë që disa ligje federale kundër “deepfake”-eve ekzistojnë, mënyra se si mund të përdoren të dhënat e përdoruesve nga bisedat me AI varet ende kryesisht nga ligjet e secilit shtet. Ky mozaik rregulloresh krijon pasiguri – veçanërisht për privatësinë – që mund të pengojë përdorimin e gjerë të teknologjisë. Për më tepër, modelet e AI mbështeten shumë në të dhëna nga interneti për trajnim, dhe në disa raste, po kërkohet që të prodhojnë të dhëna bisedash të përdoruesve në procese ligjore.
Në rastin konkret të ChatGPT-së, OpenAI është aktualisht e detyruar të ruajë të gjitha bisedat e përdoruesve – edhe ato që vetë përdoruesit i kanë fshirë – për shkak të një përballjeje ligjore në vazhdim me The New York Times. Kompania po sfidon vendimin e gjykatës dhe po përpiqet që ai të anulohet.
“Askush nuk kishte pse ta mendonte këtë gjë një vit më parë,” tha Altman, duke e përshkruar situatën si “shumë e çuditshme dhe problematike.”
The post ChatGPT nuk duhet përdorur si terapist, pasojat që mund të keni nesër në gjykatë appeared first on Kosovapost.net.
