Organizata “Gratë në të Zeza” zhvilloi në Sheshin e Republikës në Beograd një manifestim përkujtimor për 30-vjetorin e gjenocidit në Srebrenicë, me moton “Asnjëherë nuk do të harrojmë gjenocidin në Srebrenicë”.
Në kuadër të aktivitetit u realizua edhe veprimi simbolik “Serbi, shikoje veten në pasqyrë: do të shohësh Srebrenicën – 30 vite – 30 pasqyra”.
Në podiumin e statujës së princit Mihailo qëndruan aktiviste duke mbajtur numrin 8372, si kujtesë për numrin e viktimave të vrara në gjenocid.
Megjithatë, afër tubimit u mblodhën tre kundërshtarë që, përmes megafonit, mohonin se ka ndodhur gjenocid në Srebrenicë. Ata brohorisnin “Rroftë Republika Serbe” dhe shpalosnin emrat e serbëve të vrarë. Njëri nga burrat mbante në këmishë fotografinë e dënuarit për krime lufte, Ratko Mladiq, dhe një flamur me datën e shpalljes së Republikës Serbe.
Në tekst gjithashtu sqarohet se serbët e Bosnjës – me mbështetjen e autoriteteve të asaj kohe në Serbi kanë shpallur njëanshmërisht “Republikën Serbe të Bosnjës dhe Hercegovinës”, më vonë të riemërtuar si Republika Serbe.
Ky veprim u konsiderua si hyrje në luftën e Bosnjës dhe, megjithëse ishte shpallur jo kushtetues nga Gjykata Kushtetuese e BiH, data e shpalljes vijon të nderohet si Dita e Republikës Serbe.
Organizata “Gratë në të Zeza” sërish u kanë kërkuar autoriteteve të Serbisë që ta pranojnë zyrtarisht gjenocidin në Srebrenicë, duke kërkuar që presidenti dhe zyrtarët e tjerë të ndalin mohimin e gjenocidit dhe krimeve të tjera në Bosnjë e Hercegovinë.
Gjithashtu kanë kërkuar që mohim i krimeve të klasifikohet ligjërisht si vepër penale, që 11 korriku të shpallet Dita e Përkujtimit të Gjenocidit të Srebrenicës, dhe që të hiqen muralet që glorifikojnë Ratko Mladiqin.
The post Burra me fotografi të Mlladiqit shfaqen në Beograd në ditën përkujtimore të gjenocidit në Srebrenicë appeared first on Kosovapost.net.
