“Ky është momenti më i mirë i karrierës sime. Jam këtu për të shpërblyer besimin që më ka dhënë i gjithë klubi dhe do të bëj çmos për ta arritur këtë“. Ky është komenti i Samuele Ricci, nënshkrimi i ri i Milan, gjatë konferencës së tij për shtyp të prezantimit.
“Sapo mbërrita, vura re se ndihet si një familje e madhe, ku të gjithë tërhiqen në të njëjtin drejtim për të na bërë të performojmë në mënyrën më të mirë dhe të ndihemi mirë“, shtoi më tej mesfushori kuqezi, që foli edhe për trajnerin Massimiliano Allegri.
“Padyshim, ai është një menaxher i shkëlqyer, një nga më të suksesshmit. Gjëja pozitive është se ai është gjithmonë shumë i gëzuar, siç jemi ne toskanët; gjithmonë kemi një shaka gati. Shkojmë shumë mirë me njëri-tjetrin“, shtoi më tej Ricci.
“Për sa më përket mua, pozicioni në të cilin ndihem më rehat është mesfusha, në një mesfushë me tre lojtarë. Por nëse trajneri më kërkon të luaj si mbrojtës i krahut, atëherë do të luaj si mbrojtës i krahut“, deklaroi lojtari që do të debutojë me kuqezinjtë së shpejti.
Më tej, Ricci tha: “Nuk hezitova për asnjë sekondë në zgjedhjen e Milan. Do të përpiqem t’ua shpërblej besimin që më kanë dhënë, si në fushë ashtu edhe jashtë saj. Mendoj se Milani mund të jetë vendimtar në karrierën time me kombëtaren”.
“Është vendi i duhur për t’u përmirësuar, për t’u rritur. I di vështirësitë që do të has. Pasi ke bërë një hap të madh përpara, shkon të stërvitesh me lojtarë shumë të fortë dhe kështu konkurrenca rritet. Është pjesë e një karriere futbollistike”, tha Ricci.
“Unë jam vetvetja dhe nuk më pëlqen të bëj krahasime. Mund të mos jem në gjendje të shënoj 10 gola, por jam këtu për t’i dhënë ekipit. Modric? Do të jetë e rëndësishme të mësoj shumë prej tij. Do të duhet të jem si një sfungjer”, tha Ricci.
The post Blerja e re e Milan prezantohet: Momenti më i mirë i karrierës sime, nuk hezitova aspak për të ardhur këtu appeared first on Telesport.
