Lionel Messi ka realizuar një tjetër investim të madh në Barcelonë. Përmes kompanisë së tij “Edificio Rostower”, ylli argjentinas ka blerë ish-galeritë “Via Wagner”, të pozicionuara në zonën ekskluzive të “Turó Park”, për 11.5 milionë euro.
Kompleksi prej 4 mijë metrash katrorë kishte mbetur i mbyllur që nga viti 1993 për shkak të mosmarrëveshjeve mes pronarëve të mëparshëm. Sipas mediave spanjolle, Messi planifikon rikonstruksionin total të godinës, e cila më pas do të përdoret plotësisht për tregun e qirave.
Projekti ka tërhequr menjëherë interesin e operatorëve të mëdhenj financiarë “tier 1”, pasi objekti konsiderohet një aset strategjik në zemër të Barcelonës.
Ky investim forcon edhe më shumë lidhjen e Messit me qytetin ku jetoi për më shumë se dy dekada. Ai vjen pas lëvizjeve të tjera të biznesit të tij, si blerja e klubit UE Cornellà, zinxhiri “MiM Hotels” dhe restorantet “Hincha”.
The post Biznesi i ri i Leo Messit në Barcelonë, investim tjetër prej 11.5 milionë eurosh appeared first on Telesport.
