Në Serbi janë duke u mbajtur protesta të vazhdueshme ndaj regjimit të Aleksandar Vuçiq, dhe në lidhje me këtë udhëheqësja e Komitetit të Helsinkit për të Drejtat e Njeriut në Beograd, Sonja Biserko, ka thënë se gjeneratat e reja janë duke protestuar kundër këtij pushteti 13-vjeçar të Vuçiqit.
Biserko për Klan Kosova ka thënë se protestuesit gjithashtu po protesojnë kundër sistemit mafioz-korruptiv që sipas tyre, e ka në krye Vuçiqin.
“Sepse shumica në Serbi kanë qenë e mendimit se këto gjeneratat e reja nuk janë të interesuara për politikën dhe se presin të përfundojnë studimet dhe të shkojnë jashtë vendit. Këtë që ata e thonë për Kosovën, është diçka me të cilin ata janë rritur. Kjo është propagandë që dominon në formimin e këtyre të rinjve.” – ka thënë Biserko.
Ajo tutje ka thënë se rinia por edhe shumë qytetarë tjerë në Serbi tashmë e kuptojnë plotësisht se Kosova është shtet i pavarur.
“Me rëndësi të themi se shumica e qytetarëve në Serbi kanë njëlloj raporti me Vladimir Putinin dhe Rusinë, në të njëjtën kohë ata shkojnë në Perëndim. Kjo është situatë goxha shumë skizofrenike. Edhe rinia e dinë që Kosova në fakt nuk është Serbi. Por në mesin e tyre ka edhe njerëz që janë me orientim djathtist dhe grupe djathtiste. Por kjo nuk është që dominon në këto protesta”. – ka potencuar ajo.
“Tani ky është një proces që do ta shohim se si do të shkojë. Askund nuk kalon lehtë, dhe nuk pritet të jep përgjigje në të gjitha çështjet që Serbia duhet të përballet. Duhet që të shikohet në pasqyrë, në mënyrë që ata ta kuptojnë gjithë atë që ka ndodhur në 40 vitet e fundit, dhe çfarë ndikimi ka pasur në rajon.” – tha Biserko.
