Një kontingjent prej 12 ushtarësh belg, luksemburgas dhe holandez, janë nisur nga Belgjika, të martën, për t’iu bashkuar Misionit të NATO-s në Kosovë, KFOR-it, ka njoftuar Ministria e Mbrojtjes e Belgjikës.
Pjesëmarrja e fundit e Belgjikës në KFOR ishte në vitin 2010.
Ky dislokim, i planifikuar nga 1 prilli 2025 deri më 30 prill 2026, do të realizohet sipas një sistemi rotacioni gjashtëmujor. Ekipi do të jetë përgjegjës për monitorimin e kufirit në mes të Kosovës dhe Serbisë.
Belgjika do të dërgojë në Kosovë edhe një dron ushtarak, transmeton albanianpost.
Ndryshe, të martën, një kontingjent ushtarësh nga Shqipëria, Bullgaria, Greqia dhe Rumania janë vendosur në Kosovë për të mbështetur misionin e KFOR-it.
Sipas njoftimit të KFOR-it, Batalioni i Forcës Multinationale të Rezervës Operacionale (ORF) ka marrë përsipër detyrat nga Batalioni i Forcës Operacionale të Rezervës turke, në bazë të planit të rotacionit të mbikëqyrur nga Komanda e Forcës së Përbashkët të NATO-s në Napoli.
Ky batalion numëron rreth 270 ushtarë dhe do të veprojë përkohësisht përkrah 200 forcave italiane të brigadës “Sassari,” të cilat tashmë janë të pranishme në Kosovë.
