Qeveria e Kosovës ka konfirmuar se Aleanca Kosova e Re, ka dërguar emrin e Bejtush Gashit për ministër të Punëve të Brendshme.
Zyra për Komunikim me Publikun e Qeverisë së Kosovës, ka konfirmuar për lajmi.net, se propozimi që Bejtush Gashi të emërohet ministër i Brendshëm tashmë i ka ardhur kryeministrit Ramush Haradinaj.
Gashi do të emërohet në pozitën e ministrit të Brendshëm pas shkarkimit të Flamur Sefaj nga ana e kryeministrit Haradinaj.
Bejtush Gashi njihet si ekspert i çështjeve të sigurisë. Ai ka qenë zëvendësministër në Ministrinë e Forcës dhe Sigurisë së Kosovës.
Gjatë vitit 2006 – 2007, Gashi u zgjodh në postin e drejtorit në Departamentin e Politikave të Sigurisë së Brendshme, në Ministrinë e Punëve të Brendshme.
