Bebe Rexha, ylli ndërkombëtar i muzikës pop, ka publikuar një seri fotografish nga një fundjavë plot ngjyra, muzikë dhe festë për të shënuar ditëlindjen e saj të 36-të.
Artistja performoi në njërin nga festivalet më të mëdha në Zvicër, Zurich Openair 2025, pikërisht në ditëlindjen e saj më 30 gusht, përpara një publiku të zjarrtë.
Në një nga fotot e publikuara në Instagram, shfaqet një fans duke mbajtur një pankartë me mesazhin “LET’S DANCE”, me një kolazh fotografish që përfshijnë edhe një pozë ikonike të Bebes – një moment që duket se ka emocionuar këngëtaren.
Para ngjitjes në skenë, Bebe ndau momente nga prapaskena, ku ajo përgatitej me glam-squad-in e saj. Në një nga fotot më virale, ajo është duke marrë grim ndërkohë që tregon fleksibilitetin e saj me një pozë energjike, duke ecur drejt performancës me stil dhe karizëm.
Pas koncertit, festa nuk përfundoi aty. Bebe dhe shoqëria e saj vazhduan atmosferën në një after party në një nga klubet më të njohura, “Jade Club”, ku ajo u pa duke kërcyer dhe festuar në orët e para të mëngjesit.
Me një kurorë “Happy Birthday” në kokë dhe një buzëqeshje që fliste vetë, këngëtarja ndau çaste intime dhe spontane me ndjekësit e saj në rrjete sociale.
Pamjet nga nata përfshijnë edhe momente të çmendura dhe plot energji, si ajo ku Bebe pozon me syze të zeza të mëdha dhe nxjerr një copë akull nga goja – një foto që reflekton frymën rockstar të saj dhe gëzimin që e ka shoqëruar në këtë përvjetor.
Pas festës në Zvicër, ajo udhëtoi menjëherë drejt Gjermanisë ku kishte një tjetër performancë të rëndësishme. Edhe pse ishte vetëm një ditë larg ditëlindjes, energjia e saj në skenë mbeti po aq elektrizuese.
