Mediumi britanik BBC i ka kushtuar një reportazh pjesëtarëve të kontigjentit britanik të KFOR-it në Kosovë.
Kronika e autoruar nga gazetari Simon Ward, ka thënë se prej një çerek shekulli ushtria britanike luan rol qenësor në operacionet paqeruajtëse të NATO-s.
Duke marrë shkas nga deklarata e kryeministrit Keir Starmer se është i gatshëm të dërgojë trupa britanike në Ukrainë në kuadër të një marrëveshje paqësore në të ardhmen, Ward ka thënë se “përvojat e forcave të armatosura në Kosovë mund të jenë të vlefshme.”
Me këtë rast, BBC ka vizituar kampin në Novosellë pranë ushtarëve nga regjimenti Royal Lancers që janë në prag të shërbimit të tyre gjashtëmujor.
“Sfondi politik në Ballkan është i ndërlikuar. Më 1999, NATO kreu bombardime ajrore mbi caqet në Serbinë fqinje si pjesë e përpjekjeve për t’i dhënë fund konfliktit me Kosovën”, ka shkruar ai.
“Fill pas marrëveshjes për paqe, forcat serbe u tërhoqën nga Kosova. Operacionet paqeruajtëse kanë vazhduar që nga atëherë, por dhuna ka shpërthyer ndër vite dhe tensionet ende vazhdojnë meqë Serbia nuk e njeh shpalljen e pavarësisë nga Kosova më 2008.”
Reportazhi ka sjell përvojën e corporal James Lowe, 31-vjeçarit nga Blidworthi në Nottinghamshire, i cili është pilot dronësh dhe e përdor teknologjinë për rikonjicion në periferitë e Kosovës, jo larg Serbisë.
“Trupat britanike i njoftojnë autoritetet serbe kur ka lëshime për fluturim dronësh ose anasjelltas, për të shmangur keqkuptimet.”
Sipas BBC-së, shumica e popullatës në Kosovë, shqiptarët, priren ta mbështesin praninë e ushtrisë britanike.
Sipas korporalit Lowe, njerëzit në Britani jo gjithmonë e shohin efektin e politikës ushtarake britanike përtejdetit, dhe, në bazë të përvojës në Kosovë, “ne ende vlerësohemi për të.”
“Kemi shkuar gjithandej dhe ata i duan ushtarët britanikë e amerikanë. Sheh rrugë që edhe janë emëruar sipas Tony Blairit”, citohet të ketë thënë Loëe.
“Ky është një prej atyre vendeve në botë ku mund të vish e të shohësh se ne kemi bërë diçka të mirë dhe ka ndikim të qëndrueshëm te njerëzit këtu.”
Më tej, në reportazh thuhet se Kosova është një vend ku tensionet mund të rriten dhe gjithmonë ka potencial për incidente.
“Kjo nënkupton se secilën herë që ushtarët dalin nga kampi, ata dalin me armë të mbushura si masë. Një prej detyrave kryesore të njësitit britanik është për t’i dhënë siguri publikut në rrugët e kryeqytetit, Prishtinës, dhe qyteteve të tjera gjithandej Kosovës.”
Sipas gazetarit Ward, edhe pse ushtarët britanikë kryejnë detyra të ndryshme anembanë Kosovës, ata përbëjnë më pak se 1 për qind të numrit të përgjithshëm të personelit të NATO-s dhe aleatëve në vend.
“Tashpërtash janë 44 ushtarë britanikë nga gjithsejt 4686 sa ka Forca e Kosovës (KFOR).”
Reportazhi ka sjellur edhe deklarimin e oficerit komandues të njësitit britanik, majorit Charlie Mackaness.
“Ne jemi këtu për të mundësuar një mjedis të sigurtë dhe rrjedhimisht ndërveprimet kanë qenë vërtet pozitive me popullatën lokale”, ka thënë Mackaness.
Ai është pajtuar që përvoja e forcave britanike që e kanë fituar në Kosovë mund të jetë e rëndësishme për operacionet e ardhshme paqeruajtëse në Ukrainë, transmeton nacionale.
“Po, mendoj se ne si regjiment jemi përfshirë në operacione të shumta paqeruajtëse gjatë dekadës së fundit, pavarësisht nëse ato ishin në Qipro a Kosovë, ndaj mendoj se kjo me siguri na ka thënë një përvojë vërtet të rëndësishme për rolin e paqeruajtësve.”
