Fushata e mbledhjes së fondeve, e nisur nga bashkëshortja e Matteo Materazzi, për të mbledhur 1.5 milionë dollarë (rreth 1.3 milionë euro), shumë e nevojshme për të realizuar sa më parë “shpresën e vetme për të ndalur sëmundjen, krijimin e një terapie të personalizuar ASO për mutacionin e Matteo (TDP-43), e ka kaluar tashmë shifrën e 200 mijë eurove.
Rruga është ende e gjatë, por solidariteti duket i madh për ish-futbollistin 49-vjeçar dhe agjentin sportiv, vëllain më të vogël të më të njohurit Marco Materazzi. Pikërisht marrëdhënia me të vëllanë ka qenë objekt i komenteve të pakëndshme në rrjete sociale, me shumë që pyesin pse Marco nuk e ndihmon Matteo financiarisht, duke përshpejtuar udhëtimin drejt SHBA-së për të provuar terapinë eksperimentale kundër formës së rrallë të SLA, që e ka prekur.
Siç ndodh shpesh, njerëzit flasin edhe kur nuk dinë gjë. Të shkruash në rrjete sociale është e lehtë, ashtu siç është edhe të gjykosh. Shumë nga komentuesit janë bazuar në faktin se dihej që raportet mes Matteo dhe Marco ishin ftohur prej vitesh, por e vërteta sot është ndryshe dhe këtë e sqaron qartë bashkëshortja e të sëmurit, tashmë në karrige me rrota, Maura.
Pyetja është e drejtpërdrejtë, i drejtohet asaj pikërisht për rolin e Marco në këtë moment (ish-kampioni i botës me Italinë është rreth 3 vite më i madh): “Për vite me radhë kanë pasur një marrëdhënie të komplikuar, por që nga fillimi i sëmundjes kanë nisur të flasin çdo ditë. Edhe Marco po jep kontributin e tij, sipas mundësive që ka, nuk duhet harruar që ka një familje. Është pranë tij, si të gjithë ne. Dhe për këtë Matteo është shumë i lumtur”.
Marco është pra më pranë se kurrë vëllait të tij në këtë moment, do të ishte absurde të ndodhte ndryshe. Ajo që po përjeton Matteo është një garë kundër kohës, pasi mutacioni i sklerozës laterale amiotrofike (SLA) e ka goditur me shpejtësi të madhe. Brenda një viti, gjendja e tij është përkeqësuar me ritme alarmante.
“Brenda pak muajsh humbi përdorimin e këmbëve dhe sot është në karrige me rrota. Tani nuk i lëviz më as krahët, vetëm pak duart, – rrëfen bashkëshortja Maura për “Corriere della Sera”. – Sëmundja po përparon me shpejtësi. Ai do të donte të shihte fëmijët të rriteshin, por nuk beson se do ta arrijë. Është realist, 50% e të prekurve nga SLA vdesin brenda tri vitesh”.
Akronimi ASO qëndron për “Antisense Oligonucleotide”. Është një terapi gjenike eksperimentale që përdor zinxhirë të shkurtër ADN-je apo ARN-je sintetike, të dizajnuara për t’u lidhur në mënyrë specifike me një ARN mesazhere të caktuar, për të bllokuar ose ndryshuar shprehjen e një proteine anormale. Në rastin e SLA me mutacionin TDP-43, si ai i Matteo Materazzi, ASO ka për synim të reduktojë grumbullimin e proteinës toksike TDP-43 në qelizat nervore, e cila shkakton vdekjen e tyre.
Vështirësia, siç e thekson bashkëshortja, qëndron në faktin se proteina TDP-43, përveçse është toksike kur është e mutuar, ka edhe një rol thelbësor në qelizat e shëndetshme. Prandaj terapia ASO duhet të dizajnohet me saktësi maksimale për të ulur vetëm formën e mutuar të proteinës, pa dëmtuar funksionin e saj normal, gjë që e bën zhvillimin e kësaj terapie shumë më komplekse sesa në rastet e mutacioneve SOD1 apo FUS, ku ASO ka treguar tashmë rezultate premtuese.
The post Bashkëshortja e Matteo Materazzi: Edhe Marco po bën sa mundet, por ka një familje… appeared first on Telesport.
