Faqja e lajmeve shkruan se Washington-i po forcon gjithashtu praninë ushtarake amerikane në Lindjen e Mesme në rast se negociatat dështojnë.
Shtëpia e Bardhë po shqyrton seriozisht një propozim iranian për bisedime të tërthorta bërthamore, duke rritur ndjeshëm praninë ushtarake të SHBA-ve në Lindjen e Mesme.
Kjo, në rast se presidenti Trump vendos të bombardojë Republikën Islamike, thanë dy zyrtarë amerikanë për faqen amerikane të lajmeve Axios.
Donald Trump ka përsëritur se do të preferonte një marrëveshje, por nuk dëshiron të presë shumë për ta arritur atë, nënvizon Axios, duke kujtuar ultimatumin dy mujor që kishte vendosur në letrën e tij dhe duke theksuar se ende nuk është e qartë nëse dhe kur ka nisur ky numërim mbrapsht.
Faqja e lajmeve shpjegon gjithashtu se Shtëpia e Bardhë është ende në mes të një debati të brendshëm midis atyre që besojnë se një marrëveshje është e mundur dhe atyre që i konsiderojnë negociatat një humbje kohe dhe mbështesin sulmet kundër objekteve bërthamore iraniane.
Axios shton se Pentagon-i në të njëjtën kohë po forcon praninë ushtarake amerikane në Lindjen e Mesme, gjë që lejon presidencën të ketë një forcë goditëse në rast se negociatat nuk do të kenë sukses.
Faqja e lajmeve shpjegon gjithashtu se të martën, Pentagon-i njoftoi dërgimin e trupave shtesë dhe mjeteve ajrore në rajon, duke specifikuar se dy aeroplanmbajtëse – Harry S. Truman dhe Carl Vinson – do të mbeten në zonë.
Javën e kaluar, Pentagon-i dërgoi disa bombardues stealth B-2 në bazën ushtarake Diego Garcia në Oqeanin Indian, një dislokim që një zyrtar amerikan tha se nuk ishte “i shkëputur” nga afati dymujor i Trump për Iranin.
Bombarduesit B-2 mund të mbajnë bomba masive depërtuese në bunker, të cilat do të ishin një pjesë kyçe e çdo veprimi të mundshëm ushtarak kundër objekteve bërthamore nëntokësore të Iranit.
Të dielën, presidenti iranian Masoud Pezeshkian njoftoi refuzimin e vendit të tij për çdo negociatë të drejtpërdrejtë me Shtetet e Bashkuara, në përgjigje të një letre nga homologu i tij amerikan në lidhje me programin bërthamor iranian.
Presidenti amerikan, në të njëjtën ditë, siguroi kanalin amerikan NBC se “bombardimet” do të ndodhin në Iran në mungesë të një marrëveshjeje për fuqinë bërthamore iraniane, duke provokuar një protestë në Teheran, i cili u përgjigj se nuk do të kishte “zgjidhje tjetër” përveçse të mbrohej.
Irani kishte paraqitur gjithashtu një protestë zyrtare diplomatike – të transmetuar përmes ambasadës zvicerane, për shkak të mungesës së marrëdhënieve diplomatike midis Shteteve të Bashkuara dhe Iranit.
