Donald Trump ishte sërish në shënjestër të një atentati. Fatmirësisht kandidati republikan për president në Shtetet e Bashkuara ka shpëtuar pa asnjë lëndim, ndërsa janë dëgjuar të shtëna me armë zjarri.
Ngjarja ka ndodhur teksa ish presidenti po lunte golf në fushën e tij në Florida. Shërbimi sekret, policia amerikane dhe FBI kanë ndërhyrë menjëherë duke lokalizuar dhe arrestuar autorin e dyshuar. Mediat ndërkombëtare, duke cituar burime pranë autoriteteve, raportojnë se personi i ndaluar është RyanWesley Routh, 58 vjeç.
Thuhet se autori i dyshuar i atentatit ndaj Trump është një aktivist pro Ukrainës. Madje Routh është përpjekur që të rekrutohet dhe si luftëtar i huaj në Ukrainë, për t’iu bashkuar rezistencës ndaj pushtimit të Rusisë, shkruan A2 CNN.
58-vjeçari ka qenë edhe në Kiev. I dyshuari ishte arratisur me një automjet, por arrestuar disa kilometra larg resortit ku gjendej republikani. Shërbimi sekret amerikan ka qëlluar në drejtim të tij, kur kanë zbuluar se ai posedonte një armë të llojit AK-47 në disa shkurre të fushës së golfit.
CNN raporton se ekipi i sigurisë së Trump ndërhyri pasi mori një informacion nga një dëshmitar për prezencën e atentatorit të dyshuar dhe të armatosur. Vetë Trump ka reaguar lidhur me ngjarjen. “Dëshiroj që t’i falenderoj të gjithëve për urimet dhe që jeni shqetësuar për mua”, shkruajti ish presidenti në rrjetin e tij social, duke shtuar se falenderimi më i madh shkon për shërbimin sekret që bëri një punë të shkëlqyer, transmeton A2.
FBI ka hapur një hetim lidhur me rastin duke e konsideruar një tentativë për vrasje. Presidenti aktual Joe Biden dhe nënpresidentja Kamala Harris janë informuar për ngjarjen dhe kanë shprehur lehtësimin e tyre për faktin që Trump është i sigurt. Gjithashtu ka reaguar më tej kandidatja demokrate për president, duke konfirmuar se dhuna nuk ka vend në politikën amerikane. Gjithashtu reagime në mbështetje të republikanit ka patur edhe nga liderë të ndryshëm nga e mbarë bota. (A2 Televizion)
