Ka përfunduar e qetë protesta e sotme kundër shtrenjtimit të rrymës, e cila mblodhi qindra njerëz në sheshet kryesore të Prishtinës.
Organizatorët kanë paralajmëruar tjetër protestë më 11 prill në rast se Zyra e Rregullatorit të Energjisë (ZRRE) nuk zmbrapset nga propozimi për shtrenjtim të rrymës për 15 për qind.
Protestuesit lanë të gjitha pankartat para Ministrisë së Ekonomisë.
Aktivisti Besnik Shabiu nga “Asnjë cent më shumë”, i ka bërë të ditura edhe një herë kërkesat e qytetarëve lidhur me çmimin e energjisë elektrike.
Shabiu tha se presin që institucionet e vendit të reflektojnë deri më datë 11 prill kur ZRrE ta marrë vendimin.
Ndërkohë që theksoi se nëse bëhet shtrenjtimi i energjisë elektrike prej 15%, ashtu siç është paralajmëruar do të ketë protesta të tjera masovike.
“Të dashur qytetarë sot është një ditë e madhe për Republikën e Kosovës, kur qytetaria aktive po e kalon testin e saj, kur është në pyetje interesi kolektiv ne dimë të bëhemi bashkë”.
“Kërkesa e grupit ka qenë shumë e qartë dhe kësaj kërkese i janë bashkuar edhe qytetarët, sepse asnjë cent më shumë nuk e meritojnë qytetarët e Republikës së Kosovës të paguajnë taksa të tjera. Ne jemi dëshmitarë se ka nisur edhe një valë e re e shtrenjtimit të produkteve ushqimore”.
“Deri ditën e premte më datë 11 prill, dita kur ZRrE ta merr vendimin, në presim që institucionet relevante të reflektojnë dhe të heqin dorë nga kjo vështirësi. Deri atëherë do të jemi të detyruar të ngrisim zërin dhe nuk do të lejojmë që jeta e qytetarëve të vështirësohet. Hiqni dorë nga kjo ide e shtrenjtimit të energjisë elektrike sepse do të përballeni me protesta masovike. Asnjë cent më shumë”, tha Shabiu
