Kryeministri në detyrë, Albin Kurti, bashkë me një prej vartësve të tij, Hekuran Muratin e ministrisë së Financave, prenë shiritin e ujësjellësit që do të furnizojë 15 mijë banorë të disa fshatareve të Fushë-Kosovës.
Kurti heshti kur u pyet nga gazetarët për krijimin e institucioneve të reja në vend.
Se kur Kosova do të bëhet me Kuvend e qeveri këtë me siguri nuk e di as e para e shtetit.
Saktë s’e di as vartësi i Kurtit në dikasterin e financave që vazhdon ta kryejë detyrën edhe të ministrit e edhe atë të deputetit.
Veçse fajtorin për këtë situatë, ky dhe partia e tij e kanë gjetur tash e një kohë të gjatë.
Murati anash s’e la as ripërsëritjen e një thirrjeje për subjektet tjera politike që t’i lënë inatet politike dhe ta mbështesin formimin e institucioneve, dhe kështu edhe ta miratojnë buxhetin e vitit të ardhshëm.
Kjo, derisa ua bëri me dije qytetarëve se Kosova ka buxhet veç deri në ditën e fundit të dhjetorit të këtij viti.
