Gjatë zgjedhjeve lokale të 12 tetorit, pati edhe “korrupsion” votash.
Sipas Policisë të Kosovës, të premten një person në Graçanicë u arrestua për veprën penale “Dhënia ose marrja e ryshfetit në lidhje me votim”, transmeton Klankosova.tv.
I dyshuari, me vendim të prokurorit është dërguar në mbajtje.
“Me 17.10.2025 lidhur me rastin është arrestuar edhe një i dyshuar mashkull kosovar dhe me vendim të prokurorit është dërguar në mbajtje”, thuhet në njoftimin e Policisë.
Po ditën e premte, në Mitrovicë të Veriut, u iniciua rast ndaj një gruaje, nën dyshimin se kishte cenuar përcaktimin e lirë të votuesit, në këtë rast viktimës.
Organet e rendit kanë bërë të ditur se e dyshuara kishte telefonuar ankuesin, duke e pyetur se a kishte votuar në ditën e zgjedhjeve.
“Me 17.10.2025 është iniciuar rasti ndaj të dyshuarës femër kosovare, e cila ka telefonuar ankuesin mashkull kosovar, duke e pyetur se a kishte votuar në ditën e zgjedhjeve. E dyshuara është identifikuar dhe është intervistuar, pastaj me vendim të prokurorit është liruar në procedurë të rregullt”, thuhet në raportin 24-orësh të PK-së.
