Presidenti i Kroacisë Zoran Millanoviq e ka anuluar takimin e liderëve në kuadër të Procesit Bërdo-Brioni i cili ishte planifikuar të mbahej në maj në Brionë, me arsyetimin se aktualisht nuk ekzistojnë kushtet për ardhjen e presidentit të Serbisë Aleksandar Vuçiq në Kroaci.
Siç u njoftua në faqen zyrtare të presidentit të Republikës së Kroacisë, vendimi u mor për shkak të deklaratave politike dhe veprimeve të Vuçiqit në periudhën e fundit, të cilat janë vlerësuar si të kundërta me qëllimet e bashkëpunimit rajonal, por edhe si faktor që dëmton marrëdhëniet ndërshtetërore dhe rrezikon stabilitetin në Evropën Juglindore, transmeton Paparaci.
Menjëherë ishte reagimi patetik i Vuçiqit i cili me këtë rast deklaroi se “Zoran Millanoviqi nuk kishte pse ta anulonte gjithë takimin, por mund të kishte ftuar lirshëm miqtë e tij nga Prishtina, Tirana dhe kudo që të donte, pasi ata gjithsesi nuk do t’ia prishnin dhe nuk do ta shqetësonin këtë atmosferë idilike”.
“Sa i përket deklaratave dhe asaj në të cilën thirret Zoran Millanoviqi, unë nuk jam shërbëtori i tij dhe nuk jam Andrej Pllenkoviq që ai të mendojë se mund të sillet me mua siç sillet me disa nga njerëzit e tij apo me disa përfaqësues të vendeve tjera. Po ashtu, nuk jam shërbëtor as i Pllenkoviqit dhe as i Gordan Gërliq Radmanit që të më përcaktojnë se çfarë do të them, por flas si president i lirë dhe liridashës i Serbisë dhe them të vërtetën”, ka deklaruar Vuçiqi.
Procesi Bërdo-Brioni, i nisur nga Kroacia dhe Republika e Sllovenisë, ka për qëllim forcimin e bashkëpunimit në rajon dhe përshpejtimin e integrimeve evropiane të vendeve të Ballkanit Perëndimor./Paparaci.com
