Pavarësisht problemeve të vazhdueshme fizike, Neymar mbetet në qendër të projektit teknik të trajnerit të ri të Brazilit, Carlo Ancelotti, përpara Kupës së Botës 2026. Në një intervistë me CONMEBOL, trajneri italian i kërkoi numrit 10 të Seleção-s të marrë kohën e nevojshme për t’u rikuperuar dhe për t’u rikthyer në kombëtare.
“Ai duhet të përgatitet mirë dhe ka kohën e mjaftueshme për ta bërë këtë. Ai është një lojtar shumë i rëndësishëm për ne përpara Kupës së Botës“, tha Carlo Ancelotti. Neymar, 33 vjeç, kohët e fundit rinovoi kontratën e tij me Santos deri në fund të vitit, klubin ku shpërtheu dhe ku u rikthye janarin e fundit.
Megjithatë, kjo periudhë e re braziliane është shënuar edhe nga lëndimet: vetëm 12 paraqitje në pesë muaj, me një total prej 3 golash dhe 3 asist në kampionatin shtetëror të São Paulo. Në Serie A braziliane, ai ka luajtur vetëm 4 nga 11 ndeshjet e luajtura nga Santos, aktualisht i pesëmbëdhjeti në renditje.
I thirrur në mars për kualifikueset e Kupës së Botës, Neymar u detyrua të tërhiqej për shkak të një tjetër dëmtimi muskulor. Gjithashtu, ai mungonte në listën e parë të hartuar nga Ancelotti në maj. Kampioni Brazilian, golashënuesi më i mirë në historinë e Seleção me 79 gola, tani synon të rikuperohet për t’u rikthyer në vitin 2026.
The post Ancelotti: Po e pres, ai do të jetë i rëndësishëm për Brazilin në Botërorin 2026 appeared first on Telesport.
