Sot në Londër po mbahet Samiti i Liderëve të Procesit të Berlinit, ngjarja përmbyllëse e këtij viti që mbledh krerët e qeverive të vendeve të Ballkanit Perëndimor.
Ambasada e Gjermanisë në Kosovë ka bërë të ditur se ky samit vjen pas një viti përgatitjesh intensive dhe ka për qëllim të sjellë “momentum të ri, rezultate të prekshme dhe një vizion të përbashkët për të ardhmen e Ballkanit Perëndimor në Evropë.”
Në njoftimin e Ambasadës thuhet se Procesi i Berlinit, i nisur nga Gjermania në vitin 2014, ka si qëllim mbështetjen e aspiratave për anëtarësim në Bashkimin Evropian të gjashtë shteteve të Ballkanit Perëndimor, duke forcuar njëkohësisht bashkëpunimin ndërmjet tyre.
“Ky proces sjell përmirësime të dukshme në jetën e qytetarëve me ndikim të menjëhershëm, siç është heqja e tarifave të roamingut apo marrëveshjet për mobilitet që mundësojnë udhëtime ndërkufitare dhe njohjen e ndërsjellë të kualifikimeve profesionale dhe akademike,” thuhet në komunikatë.
Ambasada thekson se reformat e promovuara përmes Procesit të Berlinit janë thelbësore për rrugën drejt BE-së, por jo si qëllim në vetvete.
“Ato janë një mjet për të forcuar sundimin e ligjit, demokracinë dhe përpjekjet kundër korrupsionit, duke sjellë përfitime të drejtpërdrejta për shoqërinë,” thuhet më tej.
Sipas Ambasadës gjermane, një Bashkim Evropian i fortë është jetik për stabilitetin dhe prosperitetin e kontinentit.
“Një Ballkan Perëndimor i sigurt nënkupton një Evropë të sigurt. Bashkëpunimi i ngushtë në këto fusha forcon jo vetëm secilin vend të rajonit, por edhe interesat e përbashkëta të BE-së dhe Mbretërisë së Bashkuar,” përfundon njoftimi.
Komunikata e plotë:
Sot shënohet Samiti i Liderëve të Procesit të Berlinit në Londër! Pas një viti përgatitjesh intensive, numërimi mbrapsht ka filluar – për një vrull të ri, rezultate të prekshme dhe një vizion të përbashkët për të ardhmen e Ballkanit Perëndimor në Evropë. I iniciuar nga Gjermania në vitin 2014, Procesi i Berlinit ka një qëllim të qartë: të mbështesë aspiratat për anëtarësim në Bashkimin Evropian të gjashtë shteteve të Ballkanit Perëndimor, duke nxitur njëkohësisht bashkëpunimin ndërmjet tyre. Ky proces sjell përmirësime të dukshme në jetën e njerëzve me ndikim të menjëhershëm, siç është heqja e tarifave të roamingut apo marrëveshjet e mobilitetit që mundësojnë udhëtime ndërkufitare dhe njohjen e ndërsjellë të kualifikimeve profesionale dhe akademike. Procesi i Berlinit promovon reformat thelbësore për anëtarësim në BE, jo si qëllim në vetvete, por si mjet për të forcuar sundimin e ligjit, demokracinë dhe përpjekjet kundër korrupsionit, duke sjellë përfitime të drejtpërdrejta për shoqërinë. Një BE e fortë është jetike: stabiliteti dhe bashkëpunimi në Ballkanin Perëndimor janë të pazëvendësueshme për sigurinë dhe mirëqenien në Evropë. Vëmendja jonë sot është në Londër, ku liderët e qeverive të Ballkanit Perëndimor takohen për ngjarjen përmbyllëse të këtij viti të Samitit të Procesit të Berlinit. Bashkëpunimi i ngushtë në këto fusha jo vetëm që forcon secilin vend të rajonit, por gjithashtu shërben interesave të përbashkëta të Bashkimit Evropian dhe Mbretërisë së Bashkuar. Një Ballkan Perëndimor i sigurt do të thotë një Evropë e sigurt.
