Me transmetimin e fundit të lajmeve sot në mesditë, Al Jazeera Balkans zyrtarisht ndërpreu aktivitetin.
Lajmet e fundit u prezantuan nga Dalija Hasanbegoviq Konakoviq, dhe pas një përmbledhjeje të rregullt të ngjarjeve aktuale, ajo përshëndeti audiencën e Al Jazeera Balkans dhe i falënderoi ata për besimin e tyre.
“Të dashur shikues, ky ishte transmetimi i fundit i lajmeve të Al Jazeera Balkans. Faleminderit për gati 14 vjet besim. Jemi krenarë për secilën prej 4,970 ditëve që kemi kaluar duke ju shërbyer. Po largohemi nga studioja jonë qendrore në Sarajevë,” tha Hasanbegoviq Konakoviq.
Al Jazeera Balkans do të vazhdojë të transmetojë përmbajtje të regjistruar më parë deri në fund të këtij muaji, pas së cilës sinjali do të fiket, raportojnë mediet në Sarajevë.
Kjo do t’i japë fund edhe punës së suksesshme të projektit televiziv rajonal AJB në Ballkan, i cili ka zgjatur katërmbëdhjetë vjet.
Menaxhmenti i Al Jazeera-s nuk ka njoftuar ende një arsye zyrtare për këtë vendim.
Punonjësit gjithashtu u thanë lamtumirë shikuesve në portalin e atij media, duke deklaruar se i gjithë ekipi i Al Jazeera Balkans është krenar për secilën prej 4,970 ditëve që kaluan duke u shërbyer shikuesve dhe lexuesve.
“Ne gjithmonë jemi përpjekur të jemi zëri i atyre zërat e të cilëve nuk dëgjohen, një ishull i së vërtetës, një kulturë dialogu dhe gazetarie etike. Nuk do të kishim mundur të bënim asgjë nga këto pa besimin dhe mbështetjen tuaj. Faleminderit që jeni me ne”, u tha në portalin Al Jazeera Balkans.
Në 14 vitet e fundit, Al Jazeera Balkans ka qenë veçanërisht i njohur për përmbajtjen e tij origjinale që lidhet me segmentin e dokumentarëve, por edhe me një numër projektesh të tjera. Është stacioni i parë televiziv që transmeton një program në një gjuhë tjetër përveç arabishtes dhe anglishtes.
Al Jazeera Balkans mbuloi tregun rajonal me zyra në Beograd, Zagreb, Podgoricë, Shkup, Lubjanë dhe Prishtinë.
Ka qenë e pranishme në Sarajevë që nga mesi i shtatorit 2010. Në vitin 2018, Al Jazeera Balkans themeloi AJB DOC, një festival filmi dokumentar që mbahet në Sarajevë çdo shtator.
Sindikata e pavarur e punëtorëve në BHRT tha se mbështet plotësisht gazetarët dhe punonjësit e tjerë të Al Jazeera Balkans (AJB). Sindikata tha se mbyllja e AJB ishte një goditje e madhe për pluralizmin e medias dhe lirinë e shprehjes./rtk
The post Al Jazeera Balkans mbyllet zyrtarisht pas 14 vitesh transmetimi appeared first on Kosovapost.net.
