Abdixhiku për aktakuzën ndaj rezervave shtetërore: Këta janë të rrezikshëm për Republikën e Kosovës

Kryetari i Lidhjes Demokratike të Kosovës, Lumir Abdixhiku në Rubikon të Klan Kosovës, foli për aktakuzën e ngritur ndaj Rozeta Hajdarit për rezervat shtetërore.

Sipas të parit të kësaj partie, ky është vetëm njëri nga skandalet e tyre dhe se Vetëvendosje është e rrezikshme për Republikën e Kosovës.

“Për secilin njeri që ka qenë i përfshirë në këtë skandal, në prekjen e rezervave shtetërore ka qenë gjë e pritshme dhe për më tepër e vulosur se si VV sillej në komisionin hetimor, i cili nuk arriti të funksionalizohet në plotni. E këta janë të rrezikshëm për Republikën e Kosovës. Ky është vetëm njëri prej skandaleve të tyre. Sepse ka shumë skandale të tyre. Ne kemi shpërfaqur edhe kontratat sekret. Kjo ka qenë formë bazike e një korrupsioni qeveritar”, tha Abdixhiku.

Tutje ai shtoi se “besoj se drejtësia do të ketë guxim të trajtojë këtë rast dhe rastet e tjera”.

Drejtori i KDI-së, Ismet Kryeziu, ka vlerësuar se gjuha e vrazhdë politike që po promovojnë politikanët ka ngritur nivelin e polarizimit të shoqërisë. Ai ka bërë me dije se kjo gjuhë është bërë burim i dhunës që po rritet gjithandej. Në profilin e tij në “Facebook”, Kryeziu ka shkruar se duhet të ndalet ky fenomen. “Gjuha e vrazhdë politike që po promovojnë politikanët ka ngritur nivelin e polarizimit të shoqërisë dhe është bërë burim i dhunës, e cila po rritet gjithandej. Për ta ndalur këtë fenomen, duhet të kundërshtojmë me forcë gjuhën e ashpër politike që ndan shoqërinë dhe si pasojë, nxit dhunën fizike”, ka shkruar ai.

November 11, 2025