Ferran Torres është një nga emrat më të kërkuar në merkato. Barcelona pret të mësojë dëshirat e sulmuesit spanjoll, ende me pushime, përpara se të vendosë hapat e ardhshëm. Klubi mund t’i propozojë rinovimin e kontratës që skadon në qershor 2027, por nëse lojtari dëshiron largimin, Barça nuk do ta pengojë, me kusht që të vijë një ofertë e përshtatshme.
Ferran konsiderohet pjesë e rëndësishme e projektit të Hansi Flick, i cili e sheh edhe si një alternativë për rolin e qendërsulmuesit, pas largimit të Robert Lewandowskit, sidomos pas vështirësive për të transferuar Julian Alvarez.
Sezoni i shkëlqyer 2025/26, me 21 gola dhe 3 asistime në 49 ndeshje, si dhe paraqitjet në Botëror, ku shënoi golin vendimtar në finale, kanë tërhequr vëmendjen e klubeve të mëdha. Mes tyre është PSG, që ka nisur kontaktet, por ende nuk ka bërë ofertë zyrtare.
Barcelona e vlerëson kartonin e tij rreth 55 milionë euro dhe nuk dëshiron ta shesë lirë. Megjithatë, klubi katalanas e di se nuk mund të konkurrojë me pagën që PSG mund t’i ofrojë. Nëse Ferran zgjedh një aventurë të re, Barça do ta lejojë largimin për të shmangur humbjen e tij pa përfitim financiar në vitin 2027.
The post Barcelona, çfarë do të bësh me Ferran Torres? Vigjëlon PSG-ja, duhet vendosur shpejt appeared first on Telesport.
