Ish-kryeministri malazez Dritan Abazoviq dhe ish-ministri i brendshëm Filip Adziq u morën në pyetje në Departamentin Special të Policisë (SPO) si pjesë e hetimit për dhënien e nënshtetësisë biznesmenit nga Kosova, Naser Ramaj, raporton gazeta malazeze Vijesti.
Abazoviq konfirmoi se dhjetë ditë më parë dha një deklaratë si qytetar, por nuk donte të fliste për detajet e intervistimit në polici.
Zyra e Prokurorit të Shtetit në Mal të Zi po heton nëse ka pasur keqpërdorim me detyrën zyrtare kur Ramajt iu dha nënshtetësia nderi në bazë të së drejtës diskrecionare në përfundimin e mandatit të Qeverisë së 43-të të Malit të Zi, të cilën e udhëhoqi Abazoviq.
Hetuesit janë të interesuar për dokumentacionin mbi bazën e të cilit zyrtarët shtetërorë në atë kohë vendosën të miratojnë dhënien e shtetësisë për Ramajn, shkruan Vijesti.
Para se të merrte pasaportën malazeze, Ministria e Financave dha një opinion pozitiv për kërkesën, Agjencia e Sigurisë Kombëtare kreu një kontroll pozitiv sigurie dhe më pas Kryeministri Abazoviq i propozoi Ministrisë së Brendshme që Ramajt t’i jepej nënshtetësia.
Ramaj e paraqiti kërkesën më 28 gusht 2023, duke iu referuar nenit 12 të Ligjit për Shtetësinë Malazeze. Në kërkesë, ai deklaroi se është “një dashnor i madh i Malit të Zi, të cilin e konsideron vendin e tij”.
Megjithatë, sipas Vijesti, në atë moment kompanitë e tij nuk ishin pa probleme. Kompania “Alart centar” ishte në listën e borxhlinjve tatimorë, ndërsa “Nova gradnja” është e bllokuar që nga vera e vitit 2021 për shkak të një borxhi prej rreth gjysmë milioni eurosh.
Pavarësisht kësaj, procedura për dhënien e nënshtetësisë së nderit u përfundua saktësisht për dy muaj, megjithëse shumë kërkesa për shtetësi të rregullt presin me vite për shkak të procedurës komplekse, shkruan Vijesti.
Abazoviq i propozoi Ministrit të Brendshëm të atëhershëm, Filip Adziq, t’i jepte shtetësinë Ramajt, me sqarimin se kompania e tij po ndërton kompleksin multimilionësh “Porto Budva”, i cili ka rëndësi të madhe ekonomike për Malin e Zi.
Në shpjegim thuhej gjithashtu se Ramaj është një humanist i madh që merr pjesë në aksione të shumta për të ndihmuar fëmijët dhe familjet në nevojë sociale.
Vetëm katër ditë pasi Ministria e Punëve të Brendshme i lëshoi pasaportën Ramajt, mandati teknik i qeverisë së Abazoviqit skadoi. /Paparaci.com
