Avokati Arianit Koci ka njoftuar se e ka marrë përsipër përfaqësimin juridik të Aulona Memetit, nënës që po trajtohet bashkë me djalin e saj dy-vjeçar në Klinikën e Pediatrisë në Qendrën Klinike Universitare (QKUK) dhe që ekspozoi kushtet e mjerueshme brenda kësaj klinike.
Koci njoftoi sot se Memeti dhe fëmija e saj nuk morën trajtim të dinjitetshëm në QKUK.
“E kam marrë përsipër përfaqësimin juridik të Aulona Memetit. Si nënë e një djali dyvjeçar, Aulona Memeti ka kërkuar që fëmija i saj të trajtohej me dinjitet dhe në kushte elementare në Pediatrinë e QKUK-së”, shkroi Koci në një postim në rrjetin social Facebook.
“Shëndetësia publike në Kosovë ka vite që është objekt shqetësimi serioz. Ky rast nuk mund të shihet i shkëputur nga ai realitet”, tha Koci.
Sipas Kocit, kjo “nuk do të thotë se përgjegjësia është kolektive”.
“Përgjegjësia është gjithmonë individuale dhe duhet të përcaktohet mbi bazën e fakteve. Megjithatë, kur probleme të ngjashme përsëriten ndër vite, nuk mund të anashkalohet as përgjegjësia institucionale dhe strukturore”, shkroi ai.
Si përfaqësues juridik i Aulona Memetit, Koci zotoi se do të angazhohet “që të drejtat e klientes sime të mbrohen plotësisht dhe që ndaj saj të mos ushtrohet asnjë formë presioni”.
