Përtej dyshimeve të ngritura pas barazimit ndaj Republikës Demokratike të Kongos në ndeshjen e parë të Botërorit 2026, në Portugali po shtohet frika për një konflikt të brendshëm që mund të përçajë kombëtaren në kulmin e turneut. Me aktivizimin e CR7 si titular, në qendër të debatit publik janë vendosur dy kampe: ata që besojnë se Roberto Martínez nuk duhej ta linte sulmuesin e Al Nassr në fushë për të gjitha 90 minutat dhe ata që kërkojnë respekt për legjendën më të madhe në historinë e futbollit portugez. Madje, disa pretendojnë se ndaj yllit portugez po zhvillohet një bojkot i qëllimshëm.
Që nga përfundimi i ndeshjes ndaj RD Kongo, rrjetet sociale të disa futbollistëve të Portugalisë janë mbushur me fyerje dhe komente që kërkojnë më shumë respekt për CR7. Bruno Fernandes, Vitinha, João Neves dhe Pedro Neto, mes të tjerëve, panë postimet e tyre në Instagram të pushtoheshin nga akuza se po e nënvlerësonin Ronaldon dhe se ishin ziliqarë për arritjet e numrit 7 të Portugalisë.
“Kjo tregon rrezikun e një lufte civile që mund të kemi brenda kombëtares. Çdo kritikë ndaj Cristiano Ronaldos shkakton reagime të menjëhershme dhe prej aty lind një polarizim i madh”, – deklaroi Vítor Pinto, zëvendësdrejtor i gazetës “Record”.
João Neves, të cilit i atribuohen fjalët se të gjithë e respektojnë dhe e admirojnë Ronaldon për gjithçka ka arritur, por se tani ai është thjesht një lojtar si gjithë të tjerët në grup, akuzohet gjithashtu se nuk ia pasoi topin Cristianos gjatë ndeshjes së parë të Botërorit. E njëjta kritikë është drejtuar edhe ndaj disa futbollistëve të tjerë portugezë, të cilët disa tifozë i fajësojnë për një bojkot të supozuar ndaj numrit 7.
“Nuk besoj se ka pasur ndonjë bojkot ndaj Cristiano Ronaldos dhe dua ta bëj të qartë që tani. E përsëris, nuk ka ekzistuar asnjë bojkot i organizuar kundër Cristiano Ronaldos brenda kombëtares. Megjithatë, është e vërtetë që Portugalia nuk u lidh mjaftueshëm me sulmuesin e saj qendror dhe as nuk kishte një strategji ku ai të krijonte hapësira që lojtarët e tjerë të çanin mbrojtjen dhe të finalizonin aksionet”, – analizoi Vítor Pinto.
Ky debat rreth figurës së Cristiano Ronaldos nuk është diçka e re në Portugali, por disa nga kritikat e ditëve të fundit kanë qenë të paprecedenta. Nuno Saraiva, kolumnist i “A Bola”, publikoi një opinion me titull “Faleminderit për gjithçka, Cristiano. Tani është koha të largohesh!” Në të bën thirrje që Portugalia të hapë një kapitull të ri, duke argumentuar se sulmuesi i Al Nassr nuk është më pika kryesore e referimit të kombëtares.
Një klimë e mbushur me tension dhe pasiguri që Roberto Martínez do të duhet ta analizojë dhe ta zgjidhë përpara sfidës ndaj Uzbekistanit (e martë, ora 19:00 sipas orës europiane), pasi një tjetër hap fals mund ta komplikojë ndjeshëm rrugëtimin e Portugalisë në Kupën e Botës.
The post Rrezik për “luftë civile” te Portugalia… Shokët e CR7 akuzohen se po e bojkotojnë, duke mos ia pasuar topin appeared first on Telesport.
