Policia thotë se është vënë në kërkim të të dyshuarit pasi të paktën 12 persona u qëlluan pranë një festivali në Toledo, në shtetin amerikan të Ohajos.
Departamenti i Policisë së Toledos tha se 10 persona “raportohet se janë në gjendje të qëndrueshme, ndërsa dy mbeten në gjendje kritike”.
Ai tha se iu përgjigj një raporti për të shtëna pranë Festivalit Old West End rreth orës 17:37 sipas orës lokale (21:37 GMT) të shtunën.
Zëvendësshefi i Policisë së Toledos, Joe, tha se dukej se dy persona qëlluan me armë dhe “ndoshta po qëllonin ndaj njëri-tjetrit”, raporton BBC, transmeton Klankosova.tv.
Pamjet e shpërndara në internet – të cilat BBC ende nuk i ka verifikuar në mënyrë të pavarur – duket se tregojnë njerëz që vrapojnë dhe bërtasin ndërsa dëgjohet një breshëri të shtënash.
Mosha e viktimave varionte nga 16 deri në 61 vjeç. Kryetari i Bashkisë së Toledos, Wade Kapszukiewicz, më parë i tha agjencisë lokale të lajmeve WTOL 11 se të gjithë pritej të mbijetonin.
Festivali i Old West End e përshkruan veten si “një ngjarje dy-ditore që feston një nga lagjet më të mëdha historike në vend me muzikë live, tregje të shumta ushqimore, një kopsht birre, ture nëpër shtëpi, blerje dhe shumë më tepër”.
Policia thotë se hetimi aktualisht përfshin zonën e Delaware Avenue dhe Robinwood Avenue. Një hartë në faqen e internetit të festivalit sugjeron se një zonë muzike dhe ushqimi ndodhej në atë kryqëzim.
