Ministri i në detyrë Shëndetësisë, Arben Vitia ka thënë se me ligjin e ri për sigurime shëndetësore të gjitha barnat që blihen jashtë spitalit nga qytetarët do të kenë mundësi që të rimbursohen.
Kjo, sipas Vitisë do të ndodhë pas kontraktimit me barnatoret.
“Ligji i ri për sigurimet shëndetësore, për sigurimin e detyrueshëm shëndetësor, është një lajm i jashtëzakonshëm. Me ligjin e ri mundësohen edhe kontraktimet me institucione të ndryshme, përfshirë edhe barnatoret. Pse po i përmendi barnatoret? Një pjesë e madhe e qytetarëve, të cilët sot shpenzojnë për trajtimin e tyre, janë barnat jashtëspitalore. Dhe në këtë drejtim do të kemi mundësi menjëherë që pas kontraktimit me barnatoret të mundësohet edhe rimbursimi i barnave jashtëspitalore, që do të ketë një efekt direkt në xhepin e qytetarëve”, tha Vitia.
E derisa është lansuar shërbimi digjital për regjistrimin e lindjes së fëmijës në Klinikën Gjinekologjike të QKUK-së, Vitia është pyetur se çfarë do të ndodhë tash me punonjësit e gjendjes civile.
“E para, nëse më lejoni, që ata që janë më meritorë për këtë punë që bëhet çdo ditë këtu e nuk i falënderova, të shpreh mirënjohjen time të thellë për Klinikën e Gjinekologjisë, për drejtorin Zef Ndrejaj dhe për secilin mjek specialist, infermier e staf mbështetës që çdo ditë bëjnë punë të mrekullueshme në këtë klinikë. E dyta, natyrisht, secili shërbim i digjitalizuar do të thotë më shumë siguri, më shumë cilësi të informacionit dhe më pak letra e më pak mundësi për gabime.
Kjo që po e shohim sot është një pjesë e komponentës së SISH-it. Domethënë, më lejoni ta përsëris edhe një herë atë që e kam thënë edhe më herët: ne kemi pasur disa tentativa për ndërtimin e Sistemit Informativ Shëndetësor në Republikën e Kosovës që nga viti 2009. Mirëpo, për shkak të mosanalizës adekuate jo për shkak të ndonjë tendence të keqe ndoshta, po për shkak të mungesës së analizave ky proces disa herë ka dështuar. Dhe kanë shkuar paratë, domethënë deri në vitin 2018-2019 janë harxhuar miliona euro për Sistemin Informativ Shëndetësor, por fatkeqësisht pa rezultat.
Kjo neve na ka bërë të vetëdijshëm që asnjë proces i tillë, siç është Sistemi Informativ Shëndetësor që ka një impakt të jashtëzakonshëm në reformat shëndetësore, nuk guxojmë t’i hyjmë me idenë që ta mbarojmë sa më shpejt, mos të them ‘shkel e shko’, sepse i kemi marrë mësimet nga e kaluara. Dhe për këtë arsye, bashkë me Ministrinë e Administratës Publike dhe të Digjitalizimit, kemi bërë një analizë të thuktë ku secili hap përfshihet se kur, qysh dhe si do të bëhet. Kurse këto ngjarje sikur sot, janë të gjitha pjesëza të Sistemit Informativ Shëndetësor që në fund do të integrohen”, tha Vitia.
