Deputetja e LDK-së, Hykmete Bajrami, e ka quajtur absurde situatën me çmimet e naftës, duke theksuar se ato rriten menjëherë pas lajmeve ndërkombëtare, por nuk ulen edhe kur situata qetësohet.
Ajo për GazetaBlic akuzon naftarët dhe qeverinë për abuzim me qytetarët dhe shfrytëzim të krizës për të mbushur buxhetin.
“Është absurde ajo që po ndodh me çmimet e naftës. Në momentin që u raportua për mbylljen e ngushticës së Hormuzit, çmimet e naftës në Kosovë u rritën në kohë reale, por edhe pse dje situata u qetësua dhe çmimet ranë në bursë, te ne çmimi mbeti i njëjtë. Pra, për t’u rritur çmimi mjafton një lajm, ndërsa për t’u ulur duhet kohë. Kjo nuk është logjikë tregu, ky është abuzim që po u bëhet qyetarëve nga naftarët dhe Qeveria, e cila po e shfrytëzon krizën për ta mbushë buxhetin”, thotë Bajrami.
Bajrami, thotë se problemet me çmimet nuk zgjidhen vetëm me caktimin e marzhave apo çmimeve tavan.
Ajo thekson se mungesa e vullnetit për uljen e taksave, menaxhimi i dobët dhe mungesa e masave konkrete po pengojnë stabilizimin e çmimeve.
“E kemi thënë disa herë se kjo nuk është çështje që Qeveria e zgjidhë duke caktu marzha dhe çmime tavan të cilat u dëshmua se s’mund t’i kontrolloj, problemi është shumë më i thellë sesa vetëm çmimi, është mungesa e vulletit për të ulë taksat, mungesa e menaxhimit dhe e analizës së të dhënave nga ana e Qeverisë, mungesa e masave konkrete të cilat do të kishin ndikim në stabilizimin e çmimit”, thotë Bajrami.
Bajrami, thotë se Qeveria nuk ka të dhëna bazike për sasinë e naftës në treg dhe çmimet reale të importit.
Ajo thekson se vendimmarrja e MINT-it nuk bazohet në të dhëna reale, por në reagime të vonuara dhe selektive, duke penguar stabilizimin e çmimeve.
“Sot, nuk ka të dhëna bazike: sa është sasia e naftës në tregun vendor në momentin kur rriten çmimet? Sa litra janë importuar me çmime më të ulëta dhe a po shiten ato litra me çmime më të rritura?Për shembull, pas uljes së çmimeve në bursat ndërkombëtare, Qeveria do duhej të dinte saktësisht: sa është stoku i naftës që ka hyrë para kësaj uljeje dhe me çfarë çmimi është blerë”.
“Por ky informacion nuk po përdoret fare nga ana e MINT edhepse ekziston në Doganë. Kjo tregon se vendimmarrja nuk bazohet në të dhëna reale të tregut, por në reagime të vonuara dhe selektive”, shton tutje Bajrami.
Tutje, ajo thekson se çdo litër naftë sot sjell të ardhura shtesë për qeverinë, duke e quajtur këtë “haraç” në emër të krizës, pasi qytetarët paguajnë më shumë sesa para krizës në tregjet ndërkombëtare.
“Për me tepër Qeveria kontrollon marzhat por refuzon të ulë TVSH-në dhe akcizën, dy komponentët kryesorë të çmimit. Sa më i lartë është çmimi Qeveria vetëm në Doganë inkason më shumë para, momentalisht për çdo litër naftë mbledhën 13 – 15 cent me shumë se para krizës në tregjet ndërkombtare, ky është haraçi që Qeveria po e merr në emër të krizës”.
Bajrami thotë se Qeveria duhet urgjentisht:
“• Të krijoj një sistem ditor raportimi për stokun dhe çmimin e importit të naftës
• Të vendoset detyrim që çmimet në treg të reflektojnë në kohë të arsyshme, mos të shitet shtrejtë nafta që është importuar lirë dhe anasjelltas, të këtë sistëm të mbrojtjes fillimisht për konsumatorin dhe me pas edhe për tregtarin.
• Të rishikohen taksat: TVSH-ja dhe akciza, në asnjë mënyrë shteti të mos përfitoj nga qytetarët në emër të krizës”.
Sipas Bajramit, problemi nuk është mungesa e mekanizmave, por mungesa e vullnetit politik, pasi qeveria fokusohet në rritjen e buxhetit dhe jo në qytetarë.
“Sot problemi nuk është mungesa e mekanizmave, por mungesa e vullnetit politik, sepse Qeveria nuk e ka në fokus qytetarin e ka në fokus rritjen e buxhetit i cili më vonë do të përdorët për të blerë vota. Nafta është produkt që shkakton inflacion, andaj stabilizimi i çmimit të naftës është stopim i inflacionit, çdo ndihmë që Qeveria e jepë pas inflacionit vetëm ka me e ushqy këtë të fundit”, tha Bajrami.
